Scitian

La scitianes (de la elinica Σκύθοι), ance nomida la sacas en Asia este, ia es nomadas eurasian, probable usante la linguas iranian este, e ia es notada par la popla alfabetiste a sua sude como abitante areas grande de la stepe eurasian sentral de sirca la sentenio 9 aec a la sentenio 4 ec.

La scitianes ia es entre la poplas la plu temprana ci ia mestri la arte de gera sur cavalos. Los ave manadas de cavalos, boves, e oveas, abitada en vagones covreda par tendas, e batalia con arcos e flexas cuando montada. Los ia developa un cultur rica marcada par tombas lusosa, fabricadas de metal sofisticada, e un stilo de arte briliante.

En la sentenio 8 aec, los ia ataca Xina de dinastia Zhou. Pos, los ia estende se a ueste e desfisa la cimerianes de potia a la stepe pontica. A sua culmina, la scitianes ia domina la stepe intera, de la Montes Carpatian a Xina sentral (la cultur Ordos) e Sibir sude (la cultur Tagar), creante cual ia es nomida la impero nomada prima de Asia sentral, an si los ia ave poca cual pote es videda como un stato organizada.

Con sua base en cual es aora Ucraina, Rusia sude, e Crimea, la scitianes ueste ia es renada par un clase rica conoseda como la scitianes real. La scitianes ia crea e controla la Via de Seda, un rede vasta de comersia liante Elas, Persia, India, e Xina, e posible ia contribui a la flori de esta sivilias contempora.

En la sentenio 7 aec, la scitianes ia traversa la Caucasos e frecuente ia ataca Asia sude-este con la cimerianes, juante un rol importante en la developas politica de la rejion. Sirca 650 a 630 aec, los ia domina corta la Medianes de la plato de Iran ueste, estende sua potia a la borda de Egipte. Pos perdente controla supra Media, la scitianes ia continua causa problemes en Asia sude-ueste, incluinte un rol sinifiante en la destrui de la Impero Asur en la Saca de Nineveh en 612 aec. Pos esta, la scitianes ia entra en disputas frecuente con la Impero Acemenan.

La scitianes ueste ia sufri un defeta major par Macedonia en la sentenio 4 aec, e ia es concista gradal pos esta defeta par la sarmatianes, un popla iranian relatada de Asia sentral. La scitianes este de la stepe asian ia es atacada par la yuezhis, wusunes, e xiongnus en la sentenio 2 aec, causante ce multe scitianes ia migra a Asia sude, do los deveni conoseda como la indo-scitianes.

A alga punto, posible tan tarde como la sentenio 3 ec pos la cade de la dinastia Han e la xiongnu, la scitianes este ia traversa la Montes Pamir e coloni la Basin Tarim ueste, co la linguas scitian de cotanes e tumxuces ia es atestada en scrives brami de la sentenio 10 e 11 ec. La Rena de Cotan, a min partal saca, ia es alora concistada par la Hania Cara-Canid, cual ia resulta en la islami e turci de Xina norde-ueste.

En Europa este, per la eda medieval temprana, la scitianes e sua relatas la sarmatianes ia es ultima asorbeda ("slavida") par la popla proto-slavica de la rejion.

Omes con dragones
Un corona de Tillia Tepe, sentenio prima ec
Un gaina per un daga de Tillia Tepe, sentenio prima ec
Un orna petal de Arzhan, sentenio 8 a 7 aec
Un placa de Ordos, sentenio 4 a 1 aec
Un placa pantera de la rejion de Crasnodar, fini de sentenio 7 ec