Papua Gine Nova

Stato Autonom de Papua e Gine Nova Independen Stet bilong Papua Niugini State of Papua New Guinea
Informa jeneral
Capital:	Port Moresby
Lingua ofisial:	Engles, Hiri Motu e pisin
Dirije
Governa:	Monarcia constitual parlamental unida
- Xef de stato:	Rea Elizabeth 2
- Xef de governa:	Governor jeneral Bob Dadae
Otras
Area:	462,840 km²
Popla:	7 059 653
Densia:	15
PIB:	$28.022 bilion
Mone:
Zona de ora:	AEST (UTC 10, 11)
Numero de telefon:	675
Interede:	.pg

Papua Gine Nova (Pisin: Papua Niugini, ofisial la Stato Autonom de Papua Gine Nova) es un pais cual ocupa la dui este de la isola Gine Nova e sua isolas visina en Melanesia, un rejion de la Mar Pasifica sude-ueste, a norde de Australia. Sua capital, locada a sua costa sude-este, es Port Moresby. La area es sirca 462,840 cilometres cuadrida. La dui ueste de Gine Nova formi la provinses indonesian Papua e Papua Ueste.

A la nivel nasional, pos es renada par tre potias esterna de pos 1884, Papua Gine Nova ia institui sua autonomia en 1975. Esta ia segue cuasi 60 anios de dirije australian, cual ia comensa en la Gera Mundal Prima. Lo ia deveni un rena autonom de la Comunia de Nasiones en 1975, con Rea Elizabeth 2 como sua xef de stato.

Papua Gine Nova es un de la paises la plu cultural diversa en la mundo. La pais conteni 852 linguas conoseda, de cual 12 ave aora no parlores vivente conoseda. (Sola la pais Vanuatu es plu densa con linguas.) Pijin melanesia (pisin) es la lingua franca. La plu de la popla de plu ca 7 milion persones abita en comunias nativa, cual es tan diversa como la linguas.

Lo es ance un de la paises la plu campanial, car sola 18 persentos de sua popla abita en sentros urban. La pais es un de la min esploradas de mundo, cultural e jeografial. On sabe ce lo conteni grupos de poplas noncontatada, e rexercores crede ce multe spesies nondescovreda de plantas e animales esiste en la interna.

La Reserva Monal Internasional clasi Papua Gine Nova como un economia developante. Un crese forte en sua campo de mina e recursos ia fa ce la pais ia deveni la economia ses de la plu rapida cresentes de mundo en 2011. Governas local e nasional discute la posible de recomensa operas en la mina Panguna en la provinse Bougainville, cual es cluida de pos la gera interna en la desenios de 1980 e 1990. Cuasi 40 persentos de la popla ave un vive natural e autosustante sin asede a capital global.

La plu de la abitores vive ancora en grupos sosial tradisional forte, fundida sur cultiva. Sua vives sosial combina relijio tradisional con praticas moderna, incluinte educa prima. Esta sosias e clanes es direta reconoseda par la Constitui de Papua Gine Nova, cual espresa un desira ce "viletas e comunias tradisional resta como unias viable de la sosia de Papua Gine Nova" e proteje sua importa continuante a la vive de la comunias local e nasional.