Isis
Isis ia es un diva major en la relijio de Egipte antica, de ce sua adora ia sperde tra la mundo elinica-roman. El ia es notada prima en la Rena Vea (sirca 2686–2181 aec) como un de la carateres major en la mito de Osiris, en cual el revive sua sposo matada, la re divin Osiris, e pare e proteje sua eritor Horus. El ia es crededa como aidante la mor per entra la vive pos mori como el ia aida Osiris, e el ia considerada la madre divin de la faraon, ci ia es comparada a Horus. Sua aida madral ia es clamada en encantas curante per benefica persones comun. Orijinal, el ia jua un rol limitada en rituos real e de la templos, an si el ia es plu importante en costumes funeral e en testos majial. El ia es tipal mostrada en arte como un umana fema portante un ieroglif tronin sur sua testa. Entre la Rena Nova (sirca 1550–1070 aec), como el ia adota cualias cual parteni orijinal a Hathor, la diva xef en tempos plu temprana, Isis ia comensa es mostrada con la xapo ornosa de Hathor: un disco de sol entre la cornos de un bove.
En la milenio prima aec, Osiris e Isis ia deveni la dios la plu comun adorada de la dios de Egipte, e Isis ia asorbeda cualias de multe otra divas, e sua templo a File ia es un sentro relijial per e egipsianes e nubianes. El ia es crededa como protejente la rena de sua enemias, governante la sielos e la mundo natural, e como avente potia supra tota fortuna e destinia.
En la periodo eliniste (323-30 aec) cuando Egipte ia es renada e colonida par elinicas, Isis ia comensa es adorada par elinicas e egipsianes, con un dio nova Serapis. Sua adora ia sperde a otra partes de la mundo mediteraneo. Alga cualias de divas elinica ia es adotada par el, como la inventa de sposi e la proteje de barcones a mar. En cuando la cultur eliniste ia es asorbeda par Roma en la sentenio prima aec, la culto de Isis ia deveni un parte de la relijio roman. An si sua adorores ia es un proportio peti de la popla de la Impero Roman, los ia pote es trovada tra la impero. Sua seguores ia developa festas distinguida como la Navigium Isidis, e seremonias de inisia cual ia sembla los de otra cultos de misteria. Alga de sua adorores ia dise ce el inclui tota potias divin de femia en la mundo.
La adora de Isis ia es parada par la veni de cristianisme en la sentenios cuatro e sinco ce. Posible, sua adora ia influe credes cristian como la venera de Maria, ma la evidentes per esta influe es ambigui e controversal. Isis continua apare en la cultur de la mundo ueste, spesial en misticisme e neopaganisme, comun como un personi de natur o la aspeta femin de la divin.