Beotuc

La beotuces ia es un popla orijinal, vivente sur la isola de Newfoundland, Canada.

Comensante sirca 1500 aec, la cultur beotuc ia formida. Esta pare como la cultur de la popla ci ia migra prima de Labrador a Newfoundland sirca 1 ec. La asendentes de esta popla ia ave tre fases cultural plu temprana, cada durante sirca 500 anios.

Eruditas de la sentenios 19 e 20 temprana ia estima ce sirca 2000 persones ia abita ala a la tempo de contata par europeanes en la sentenio 15. Otras ia sujesta ce no plu ca 500 a 700 persones. Los ia abita en grupos autonom e autosufisinte de familias estendeda de 30 a 55 persones.

Como multe otra poplas de xasores-coliores, los ave gidores ma probable no xefes plu formal. Los ia abita mamateeks, formida como conos e fortida per la inverno. Estas ia es construida par ordina palos ordinada en un sirculo, liada con lunlotra a la culmina, e covreda con cortex de betules. La solos ia es escavada, con cavetas usada per dormi. Un ximineria ia es construida a la sentro.

En primavera, la beotuces ia usa ocer roja per pinta no sola sua corpos, ma ance sua casas, canoas, armas, utiles, e strumentos musical. Esta pratica ia resulta en la europeanes usante la espresa "indianes roja". La usa de ocer ia ave sinifia cultural grande. La decora ia es aplicada en un selebra cada primavera de multe dias. Lo ia mostra identia tribal. Per esemplo, la decora de enfantes nova naseda ia es un modo per bonveni los en la tribu. Preveni algun de porta ocer ia es un forma de puni.

Sua fontes major de comedas ia es renos, salmones, e focas, aumentada par colie otra spesies de animales e plantas. La beotuces ia segue la abituas saisonal de migra de sua predas xef. En la autono, los ia construi sercas, a veses 50 - 60 km de longia, usada per forsa renos migrante a la xasores espetante, armada con arcos e flexas.

La beotuces ia crea un deser de la sava de arbores e la vitelo secida de ovos de la alcos grande. Los ia conserva comedas suprapasante per usa en la inverno, trapida animales per sua pelos, e amasa la pelos per fabrica vestes calda. La lado capelosa asta sua pel per catura aira calda contra sua corpos.

Canoas beotuc ia es construida de la pel de renos o focas, e la fronte de la canoa ia es rijidi con la cortex de pisea. Canoas ia es simil a caiaces e es sirca 4.5 m en longia e .75 m en largia, con spasio sufisinte per porta enfantes, canes, e propria.

La beotuces ia ave modos de entera detaliosa. Pos envelopa la corpos en la cortex de betul, los entera la mor en locas isolida. En un forma, un tomba basa ia es covreda con un pila de rocas. A otra veses, los ia pone la corpo sur un scafal, o en un caxa, con la jenos pliada. La survivores ia pone ofres a la locas de entera per acompania la mor, como figures, pendentes, e copias de utiles.

La beotuces ia atenta evita europeanes en Newfoundland par move interna de sua colonias tradisional. Prima, los ia atenta move a areas costal diferente do la europeanes no ia ave sua campas per pexa, ma pronto no locas a la costa ia es disponable. Sua migras forsada ia priva los de alga de sua xef comedas - pexes e focas. Esta ia resulta en la xasa tro estendeda de renos per survive, e la cuantia de renos ia diminui. La beotuces ia es alora forsada de sua abitas e abituas tradisional en ecosistemes cual no pote suporta los, cual resulta ultima en sunuri e famia.

En la periodo colonial, la popla beotuc ia ance sufri presa par grupos de otra americanes orijinal: micmaces de la Isola de Capo Breton e inuites de Labrador. Los ia entra en un sicle de violente con alga de la popla nova. La cuantia de beotuces ia descrese rapida. La fatores inclui:

Perde de asede a fontes importante de comedas, de compete con la europeanes, micmaces, e inuites;
Maladias infetante a cual los no ave imunia, como variola introduida par contata con europeanes;
Tuberculose endemica, cual debili la membros de tribus; e
Encontras violente con trapores, colonistes, e la otra nativas.

Per 1829, con la mori de un fem beotuc nomida Shanawdithit (sobrina de Demasduit, imajida a supra), la popla ia es declarada estinguida.

Lias esterna

Wikimedia Commons – fotos de stradas e canales