SARS-CoV-2

SARS-CoV-2 (Severe Acute Respiratory Syndrome Coronavirus 2, Schwéieren akuten Otemweesyndrom Coronavirus 2) ass e Virus aus der Famill vun de Coronaviren, deen am Januar 2020 an der chineesescher Stad Wuhan (Provënz Hubei) nei identifizéiert gouf.

De SARS-Cov-2, dacks einfach Coronavirus oder Covid-19-Virus genannt, verursaacht eng Krankheet mam Numm COVID-19 (fir Corona virus disease 2019).

Den 11. Mäerz 2020, nodeems d'Krankheet sech vu China aus iwwer all Kontinenter ausgebreet hat, huet d'Weltgesondheetsorganisatioun (WHO, World Health Organisation) d'Krankheet als Pandemie agestuuft.

Historique

Am Dezember 2019 gouf an der chineesescher Stad Wuhan eng Unheefung vu schwéiere Longenentzündunge festgestallt. Well eng Partie vun de Patienten als Geschäftsleit um lokale Maart fir Fësch a Mieresfriichte geschafft huet, gouf ugeholl, datt do de primäre Foyer vun der Krankheet war.

De 7. Januar 2020 huet deen zoustännege chineesesche Virolog bekannt ginn, datt et sech ëm en neien, bis dohinn net bekannte Virus géif handelen. Den 13. Januar 2020 gouf déi komplett Genomsequenz vum neie Coronavirus op GenBank, enger Datebank fir Genen a Genomen um Internet, hannerluecht. Kuerz duerno gouf en éischten Diagnosentest fir den Nowäis vum Virus publizéiert.

Originne vum Virus

Et gëtt ugeholl datt de Virus vun Déieren, deenen hiert Fleesch a China um Maart ugebuede gëtt, op de Mënsch iwwerdroe gouf. Am Verdacht steet eng Fliedermaus, d'Java-Houfeisennues (Rhinolophus affinis) (Stand Mäerz 2020).

Um Spaweck

Offiziell Säit vun der lëtzebuergescher Regierung iwwer de Coronavirus: COVID-19

Referenzen an Notten