Parti communiste français

Logo	Parteizentral
	2, place du Colonel Fabien 75019 Paräis Frankräich
Basisdonnéeën
Grënnungsdatum:	30. Dezember 1920
Memberen:	130.000 dovu 70.000, déi d'Cotisatioun bezuelen (2012)
Ideologie:	Marxismus Eurokommunismus Altermondialismus Euroskeptizismus Ökosozialismus Kommunismus
Europäesch Affiliatioun:	Partei vun der Europäescher Lénk
Websäit:	www.pcf.fr

D'Franséisch Kommunistesch Partei (op Franséisch: Parti communiste français, kuerz PCF) ass eng politesch Partei a Frankräich aus dem lénkse politesche Spektrum.

Geschicht

D'Partei gouf am Dezember 1920 um Kongress vun der Section française de l'Internationale ouvrière (SFIO) zu Tours gegrënnt. Op deem Kongress gouf d'Fro gestallt, op den SFIO Member an der Kommunistescher International soll ginn. D'Majoritéit, déi dofir gestëmmt huet, huet doropshin d'Section française de l'Internationale communiste (SFIC), den haitege PCF, gegrënnt a sech vun der SFIO getrennt. Den SFIC war deemools stalinistesch ausgeriicht a war déi bedeitendst Partei direkt nom Zweete Weltkrich. Lues a lues ass den Afloss an de Walerfolleg vum PCF zeréck gaangen, besonnesch nodeems d'Partei bei de Legislativwalen 1978 vum Parti socialiste iwwerholl gi war, an duerno nach eng Kéier bei de Presidentschaftswalen 1981.

A méi rezenter Zäit huet de PCF reagéiert andeems en eng Allianz mat anere Lénksparteien agaangen ass, dem Front de Gauche, a gläichzäiteg awer seng lokal Allianz behalen huet, notamment mam Parti socialiste, de Gréngen oder méi lénks-extreme Formatioune.

D'Zeitung L'Humanité war eng laang Zäit dat offiziellt Presseorgan vum PCF. Haut ass se eng onofhängeg Struktur mee steet der Partei awer nach no.

Generalsekretären

• 1921-1923: Ludovic-Oscar Frossard
• 1924: Louis Sellier
• 1924-1929: Pierre Semard
• 1930-1964: Maurice Thorez
• 1964-1972: Waldeck Rochet
• 1974-1992: Georges Marchais
• 1994-2001: Robert Hue
• 2001-2010: Marie-George Buffet
• 2010-haut: Pierre Laurent

Regierungspartizipatioun

De PCF war e puermol a franséische Regierunge bedeelegt:

• 1944-1947: an de verschiddenen Iwwerganksregierungen nom Krich
• 1981-1984: an den dräi Regierungen ënner dem Premier-Minister Pierre Mauroy (President: François Mitterrand)
• 1997-2002: an der Regierung vum Premierminister Lionel Jospin (President: Jacques Chirac)

Um Spaweck

Commons: Parti communiste français – Biller, Videoen oder Audiodateien