Horatius Cocles
Publius Horatius Cocles[1] fuit miles veteris rei publicae Romanae celebratus ob defensionem pontis sublicii contra exercitum Clusinum.
De evento in ponte Sublicio
[recensere | fontem recensere]Anno 508 a.Chr.n.[2] Porsenna rex Clusinus ad regnum Tarquiniorum restituendum cum infesto exercitu Romam aggressus primo impetu Ianiculum cepit. Nunquam alias ante tantus terror Romanos invaserat: ex agris in urbem demigrant; urbem ipsam saepiunt praesidiis. Cum alia urbis pars muris circumdata esset, alia Tiberi obiecto tuta videbatur. Sed Pons sublicius iter paene hostibus dedit, nisi unus vir fuisset Horatius Cocles[3]. Is pro ponte stetit, et aciem hostium solus sustinuit, donec pons a tergo interrumperetur: ipsa audacia obstupefecit hostes; ponte rescisso, armatus in Tiberim desiluit et incolumis ad suos transnavit. Grata erga tantam virtutem civitas fuit; Horatio tantum agri datum est, quantum uno die circumarari potuisset. Statua quoque ei in comitio posita est.
Dicta
[recensere | fontem recensere]- "Tiberine pater, te sancte precor, haec arma et hunc militem propitio flumine accipias."[4] Prex Horatii, cum in flumen Tiberim desiliret.
Trivia
[recensere | fontem recensere]Hanc fabulam a Livio traditam Petrus Pariati in eo tractavit libello, quo Ioannes Iosephus Fux ad Festa teatrale per musica 'Costanza e Fortezza' (id est opera Constantia et Fortitudo) componendam usus est.
Notae
[recensere | fontem recensere]- ↑ Dionysius Halicarnasseus, Antiquitates Romanae, v. 24, 25.
- ↑ Sequentia secundum Livium ab urbe condita 2,9. Confer Polybium VI.3
- ↑ Cocles sive ocles, ut Varro in de lingua Latina 7,71 explicat, idem valet atque unoculus.
- ↑ Livius, ab urbe condita 2,10,11
Bibliographia
[recensere | fontem recensere]- "Cocles, Horatius" in Gulielmus Smith (1844–1849). Dictionary of Greek and Roman Biography and Mythology [📖]. Londinii: Taylor & Walton
Nexus externi
[recensere | fontem recensere]
Haec pagina textum incorporat ex opere abbatis C. F. Lhomond De viris illustribus urbis Romae, 1779.
