Collateral (pellicula 2004)
| Collateral (2004) | |
|---|---|
 | |
| Dispositor | Michael Mann |
| Primi actores | Thomas Cruise Jamie Foxx |
| Duratio | 120 minuta |
| Natio | Civitates Foederatae Americae |
| Lingua | Anglica |
Collateral est pellicula criminalis anno 2004 ad spectatores delata, a Michaele Mann disposita et a Stuart Beattie scripta. Partes primas Thomas Cruise et Jamie Foxx agunt. Pellicula Angelopoli in California nocturna posita est, et eventa die 24 Ianuarii hora 18:30 incipiunt; proximo die hora 06:40 omnia praeterierunt.
Collateral anno 2004 praemium BAFTA ob cinematographiam optimi generis meruit.
Argumentum
[recensere | fontem recensere]Angelopoli Maxius Durocher taxiraedarius vigiliam suam vespertinam incipit, ut solet. Inter alios vecturam praebet Annae Farrell accusatrici ad officium suum iturae. Bene sibi convivunt, et Anna chartulam suam salutatoriam ei dat. Deinde conscendit Vincentius, homo elegans adspectu efficaci, qui negotiatorem se proponit. Vincentius Maxio persuadet, ut polliceat se ea nocte ad quinque locos destinatos eum vecturum. Patet fere statim Vincentium sicarium mercennarium esse, cui ea nocte propositum est quinque homines iudicio drogarum implicatos interficere. Sed primum inceptum in cassum cadit, quo facto Vincentius Maxium obsidem retinet, eumque per nocturnam Angelopolin ab una destinatione ad proximam vehere cogit. Vincentius proximo loco destinationis manus Maxii ad rotam aurigatoriam adligat. Absente Vincentio, Maxius bucina autocineti auxilium vocare conatur. Sed nihil efficit nisi duos iuvenes adducit, qui rapinam cogitantes chartophylacium Vicentii auferrent. Quos Vicentius pistolio occidit et chartophylacium repetit.
Raimundus Fanning, investigator LAPD, qui homicidia nocturna indagare incipit, eventa noctis cum drogarum iudicio, quod postridie habendum est, coniungit. Itaque ad necrocomium valetudinarii proficiscitur visurus cadaver Sylvestris Clark, causidici criminalis secundaeque victimae Vincentii. Cadaveribus duorum raptorum iuvenum simul visis intellegit eos quoque ab isto sicario occisos esse. Quae cum ita sint, biocolytis contingit, ut Vincentii tertiam destinationem, diverticulum jazz perfrequens, recte coniectent. Dum haec a biocolytis geruntur, Vincentius Maxio iubet, ut in diverticulum jazz praeeat quaesitum victimam tertiam, Danielem, cui propositum est adversus clientem Vicentii testficari. Maxius cum Vincentio agit, ut Danieli parcat, sed Vincentius huic quaestionem de Miles Davis ponit et respondentem necopinato in caput sclopetat. Fanning Maxium servare conatur, sed in diverticulo a sagittario occiditur.
Deinde Vincentius Maxium ad taxiraedam redire cogit. In fuga ambo rixantur, et Maxius suum vehiculum in calamitatem vehit, quo facto ex Vincentio separatur. Mirabile dictu, Maxius ultimam destinationem Annam esse reperit, accusatricem, quacum antea amicissime confabulatus erat. Ad salvandam Annam revertitur. Telephonum ex ignoto quodam furatus Annam de periculo admonet. Dum haec geruntur, Vincentius pistolium sibi parat et Maxium Annamque persequitur, qui ad ferriviam rtuusmetropolitanam fugiunt. Sclopetatio in curru fit, et Vincentius glande a Maxio emissa graviter vulneratus in sellam labitur et e vita silentio excedit.
Maxius et Anna proxima statione exeunt, et cadaver Vincentii solus curru vehi pergit.
Partium distributio
[recensere | fontem recensere]- Primae partes
- Thomas Cruise : Vincentius
- Jamie Foxx : Maxius Durocher curru vehi continuar
- Secundae partes
- Jada Pinkett Smith : Anna Farrell
- Marcus Ruffalo : Raimundus Fanning
- Petrus Berg : Ricardus Weidner
- Brussus McGill : Franciscus Pedrosa
- Irma P. Hall : Ida Durocher
- Barry Shabaka Henley : Daniel Baker
- Klea Scott : Zee
- Xaverius Bardem : Felix Reyes-Torrena
- Aemilius Rivera : Paco
- Thomas Rosales : Ramon Ayala
De pellicula trivialia
[recensere | fontem recensere]Stuart Beattie, scriptor Australianus, cum septendecim annorum domum ex aeroportu Sydneii taxiraeda veheretur, hanc fere cogitationem in animum induxit: imaginabatur enim quendam homicidio furiosum in sella postica taxiraedae sedentem, quocum auriga neglegenter fidissimeque confabuletur. Haec Beattie primum duabus schidis adumbravit posteaque in scaenarium composuit. Quod nonnullis interpositis vicibus a DreamWorks adquisitum est. Non tamen elaboratum est, antequam Mann, Cruise, et Foxx pelliculae operam dederunt.
Cinematographia per totam Angelopolin facta est. Collateral prima fuit pellicula, quae machina Viper FilmStream Camera perfecta est.