Clemens Maria Hofbauer

Clemens Maria Hofbauer (natus Johannes Dvořák die 26 Decembris 1751 Tasovice nad Dyjí in Moravia; mortuus die 15 Martii 1820 Vindobonae) presbyter catholicus Austriacus, monachus sanctus et romanticismi fautor fuit. Sepultus est in templo Mariae in Litore.

Clementis Mariae Hofbauer statua ante fanum Franciscanorum Vindobonensium posita

Vita

Filius lanionis a matre educatus est. Annis inter 1767 et 1769 pistoris officium in Znoymae edidicit antequam in conventu Praemonstratensi ad Louka panes conficeret. Consobrino Ioanne intermediatore permissum est, ut vir XXI annorum ibidem in gymnasio religioso alumnus acciperetur. Studiis scholasticis finitis votum religiosum eremitae ad Tiburem emisit nomen Clementis assumpturus. Postea anachoreta in vico quodam haud procul a Znoyma erat et hermitagium sibi erexit. Anno 1779 Vindobonam itum est ubi in principio iterum munere furnario functus est. Familia Maul autem fecit ut Clemens philosophiae et theologiae studeret. Anno 1784 Romae Congregationi Sanctissimi Redemptoris se aggregavit, anno insequenti autem professionem religiosam fecit et sacerdos ordinatus est.

Anno 1787 autem, cum iter in Russiam faceret, Varsoviae retentus est. Presbyteris aliis deficientibus rogatus est, ut ibidem decanus ecclesiae Germanicae ad Sanctum Bennonem fieret. Quod munus laudandum plus quam duo decennia implevit cum cura pauperum, ut apostolus Varsoviae vocaretur. Polonia a Francis occupata Clemens anno 1808 Vindobonam revertit et in ecclesia Franciscanorum operam dabat. Anno 1813 rector ecclesiae Sanctae Ursulae creatus est. Qua in parochia magnus labor socialis incohatus est, quem auctoritates tam saeculares quam ecclesiastici interdum impediebant. Insistebat, ut apud catholicos quoque ars bene praedicandi coleretur. Inter eius discipulos, qui postea praedicatores optimi facti sunt, domini Madlener et Veith mentionis digni sunt. Inimicos sibi genuit, cum contra Iosephinismi verucas pugnaret. Unde factum est, quod non ante annum 1819/20 Congregatio Sanctissimi Redemptoris in Austria inseri potuit. Cum Varsoviae degeret, variis in terris monasteria nova aperire in animo habuit. Quae incepta omnia ad irritum ducta sunt.

Hofbauer litterarum defensor

Vindobonae ex anno 1818 Clemens, ipse nihil scribens, romanticorum scriptorum circulos visebat. Fridericus Schlegel eum saepius ad coetum "Stroblkopfgesellschaft" invitaverat, ubi conversabantur Dorothea uxor, Ioannes et Philippus Vitus filii, Clemens Brentano, Iosephus de Eichendorff, Adamus Müller de Nitterdorf, Zacharias Werner, insuper pictor Fridericus Klinckowström et Iosephus Pilat Metternici secretarius. Qui omnes a Clemente Maria Hofbauer spiritualiter inspirati et moti sunt. Philosopho Antonio Günther et iuristae Othmaro Rauscher persuadebat de sacerdotio adoptando. Hofbauer periodicorum momentum intellexit et hortabatur ut folia ad illuminandos animos nascerentur (e.g. "Ölzweige".)

Honores

• 1888: beatificatio
• 1909: canonizatio
• 1909: Pius X pontifex maximus ei titulum apostoli Vindobonae tribuit
• 1914: patronus urbis Vindobonae

Nexus externi

Vicimedia Communia plura habent quae ad sanctum Clementem Mariam Hofbauer spectant.

• "Klemens Maria Hofbauer. Ein Europäer des 18. Jahrhunderts." - laudatio in paginis fratrum congregationis Vindobonensis
• Rudolf Grulich: "Hl. Klemens Maria Hofbauer - der Apostel Warschaus und Wiens." - Apud: Kirche-in-Not.de, 13.3.2020
• biografio en la angla