Cirin Abu Ɛaqla

Cirin Abu Ɛaqla (s taɛrabt : شيرين ابو عاقلة ) isem-is Kamel d : Cirin Neṣri Anṭun Abu Ɛaqla tlul ass n 03 n yebrir 1971 di Lquds (Uṛacalim) , temmut deg wass n 11 di mayyu 2022 deg yigiṭunen n Janin id-yezgan deg wasif n umalu , d taneɣmast tafalesṭinit tamarikanit . Texdem deg ubadu n Al Jazeera i 25 n yiseggasen , seg 1997 armi d 2022. Lmut-is tekka-d mi terza akken ad d-ssugen d acu yellan deg yigiṭunen n Janin , imiren i temmut imi tḥuza-tt terṣast s aqerru . Adabu afalesṭini d Ḥamas nnan-d belli d iserdasen n Israyel i tt-yenɣan , ma d wid n Israyel rran-tt-id ɣef kra n yifalesṭiniyen , maca inadiyen n yiɣmisen n Israyel s yiman-nsen d tittekkayin i yettnaɣen ɣef yizerfan n umdan akka am Betselem beyynen-d belli tarṣast tekka-d seg tnilla n Israyel , ar tura Israyel tbeddel awalen-is ukkuz n yiberdan

Lmut n Cirin yewwi-d tiririyin seg umaḍal kamel , ifalesṭiniyen d yisrayiliyen beyynen-d tamuɣli-nsen , tiddukla n Turuft d uxxam amellal daɣen fkan-d rray-nsen , ssawlen i unadi n tidet ara d-yilin mebla amili deg lmut n tneɣmast-agi . Akka yernu , azekka-nni , di lǧanaza-ines , iserdasen n Israyel uten wid yeddan akken ad temḍel , d ayen id-yuwin awalen-nniḍen .

Tudert

timẓi d ulmud

Cirin Abu Ɛaqla tlul deg useggas n 1971 deg lquds i twacult tamasiḥit taɛrabt yesɛan iẓuran n Bitḥem ,  sɛan lwert ayunani-urtuduksi asuri-akatuliki .  Teɣra deg uɣerbaz n Bit Ḥanina . Syin terza ɣer tmurt n Urdun i deg teɣra deg yiwet n tseddawin-ines , seg tseddawit n Yarmuk deg Urdun tewwi-d agerdas-is di tɣemsa , imiren tuɣal ɣer Falesṭin .

Axeddim

Texdem Cirin di rradyu n Monte-Carlo d Voice of Palestine . Texdem ula d ɣer UNRWA , , Amman Satellite Channel d MIFTAH . Deg 1997 texdem deg Al Jazeera deg uḥric-ines aɛrab , tezdeɣ yernu texdem deg Uṛacalim n usammer , tessugen-d imenɣi yellan gar wudayen d yiɛraben , tettwassen s usugen n Intifaḍa tis snat , tezga tessugun lǧanazat n yimeqqranen ifalesṭiniyen .

Lmut

Asegnaf n Ibn Sina

Deg wass n 11 di Mayyu 1971 , tenna-d tenɣelfa n tdawsa tafalesṭinit , belli Cirin temmut deg usegnaf n Ibn Sina , mi tella tessugun imenɣi yellan d yiserdasen n Israyel , i yruḥen ad ikecmen ɣer yixxamen n yifalesṭiniyen , ineggura-agi ur qbilen ara ad yeḍru way-a , aneɣmas Ɛli Ṣamudi tḥuza-t terṣast deg uɛrur maca yedder , ma d nettat , tḥuza-tt deg uqerru .

Aclaḥ n lǧifa

Yenna-d unemhal n tujjya di tseddawit n Najaḥ belli tarṣast i yḥuzan Cirin deg walaɣ-is tella tqreb-itt mliḥ , d awezɣi ur tt-yettwali ara usserdas n Israyel , ihi , d lekdeb acu id-qqaren yisrayiliyen . Daɣen anemhal n tujjya deg tseddawit n Nabels yenna-d belli tarṣast tḥuza-tt deg uqerru , win itt-yewten yella yebɣa annecta , mačči d tiḥuzin kan akka mebla lɛamda . Imiren kan iserdasen , d yimsulta n Israyel ẓedmen s axxam n Cirin id-yezgan deg Lquds , ssufɣen akk wid id-yusan ɣer lǧanaza ad wasin axxam n Cirin , tuwet-iten , tessufeɣ-iten .

Tiririyin

Aṭas n tmura id-yennan belli ḥeznen , rfan seg wayen yeḍran , ssaxlen ɣer unadi i yɛedlen , akken ad iwali acu yeḍran , aselway n Falesṭin yenna-d d awezɣi ad qedcen d yisrayiliyen neɣ ad nadin yid-sen deg wayen yeɛnan tamsalt-agiimi d nutni i tt-yenɣan . Axxam amellal daɣen yenna-d belli yerfa yernu ssawlen ɣer unadi iɛedlen , ssḥasfen imi tin yemmuten d tamarikanit , imi Cirin tesɛa taɣlent tamarikanit .

Lǧanaza

Deg wass n 13 di mayyu 2022 , temḍel Cirin Abu Ɛaqla , wwin-d tafekka-s seg usegnaf afranis n Saint-Joseph , wid itt-yuwin xedmen timesbaniyin , ssawalen deg-s ɣer tlelli d uqader n yiẓerfan n uneɣmas , ssawal-as i Cirin tameɣrast , refden yid-sen ikenyalen ifalesṭiniyen , ddan di lǧanaza-nni inselmen d imasiḥiyen , imiren imsulta n Israyel uten wid yeddan di lǧanaza , sferqen-ten s u=sexdem n yisɣaren d lbumbat n lgaz , aṭas n tmura id-yesbeggnen reffu-nsent neɣ awham-nsent seg usexdem n tewɛer mebla tasebba , temḍel Cirin ɣer tama n yimawlan-is , xas akken yernu kecmen yimsulta ɣer tmeqbert , zzin as-d i uzekka-ines s yiqjan ibulisiyen .