„Free Four“ — ინგლისური პროგრესული როკ-ჯგუფ პინკ ფლოიდის სიმღერა ალბომიდან Obscured by Clouds.[1][2] იგი დაწერილია როჯერ უოტერსის მიერ, რომელიც ასრულებს წამყვან ვოკალს. სიმღერა იწყება ათვლით, მაგრამ გამოყენებულია სიტყვების თამაში, „One, Two, FREE FOUR!“.
სიმღერა ეხება თემებს, რომლებიც შემდგომ ალბომებში როჯერისთვის უფრო ტიპურად იქცა - მისი მამის ომში დაღუპვას და მუსიკალური ინდუსტრიის „სისასტიკეს“. თუმცა სიმღერა მშვიდია ლირიკული ნაწილის დროს, გიტარის სოლოს ხასიათი მძიმესკენ იცვლება. „Free Four“ გამოიცა სინგლის სახით 1972 წელს და მოხვდა FM რადიოსადგურების ჩარტებში.
ფილმში „ველი“ სიმღერა ახლავს მთებში ასვლის სცენას და ადგილობრივი თაღლითებისგან ცხენების შეძენის ეპიზოდს - როდესაც პერსონაჟი ვივიანი მთელ უკანასკნელ ფულს ხარჯავს. სიმღერის რამდენიმე სტრიქონი ფილმის ვერსიაში განსხვავდება.
