Das Leben der Anderen
 | Artikel iki butuh pranala luwih akèh nyang artikel liya supaya bisa kaintegrasi ing bauwarna iki. (Oktober 2016) |
Das Leben der Anderen (Jawa ' Kauripané wong liya') iku sawijining filem Jerman taun 2006. Sutradara Florian Henckel von Donnersmack sing nganggit filem iki saka skénario minangka filem perdanané, bisa olèh kasuksèsan déné akèhé para pamirsa biyoskup saindenging donya. Film drama iki fokusé nuduhaké aparat kaamanan nagara lan urip ing kalangan para sutresna budaya ing Berlin Wétan. Film iki uga kritis marang sajarahing Jerman Wétan. Téma filem iki ya iku manawa kagunan sajati iku bisa munculaké watek becik ing manungsa lan nggambaraké kamungkinan pangapuraning kaum durjana déning kurban.
Para paraga sing wigati dhéwé dimainaké déning Ulrich Mühe, Sebastian Koch, Martina Gedeck lan Ulrich Tukur. Filem iki bisa diprodhuksi mawa anggaran sing rélatif cilik lan gaji para juru main sing ora lumrah murahé.
Para kritik olèhé ngelem prèstasiné para paraga mawa akèh banget. Akèh panulis resènsi uga marem manawa sawisé filem-filem komedi, entèk-entèkané ana filem prakara Jerman Wétan utawa Republik Démokratis Jerman sing kritis. Nanging para kritikus iki kapara loro apa sing digambaraké iku réalistis apa ora. Filem iki olèh pamulèn akèh, contoné der Deutsche Filmpreis 2006 (ing pitung kategori saka sawelas nominasi), der Bayerische Filmpreis 2006 (ing patang kategori), Pamulèn Film Éropah (ing telung kategori) lan Pamulèn Oscar kanggo kategori filem ing basa ngamanca sing apik dhéwé.
Ing buku filem lan komentar audio DVD, para juru main Mühe lan Donnersmarck ngandaraké didugané aktivitas Stasi Jenny Gröllmann lan Gregor Gysi. Sawisé banjur ana prakara hukum ing pangadilan sing mutusaké manawa média-média iku ora olèh dipasaraké manèh lan kudu ditarik saka ideran.