Maha Vajiralongkorn
| ||||
.png) | ||||
Maha Vajiralongkorn
มหาวชิราลงกรณ | ||||
| Ríkisár | 13. október 2016 - | |||
| Skírnarnafn | Maha Vajiralongkorn Bodindradebayavarangkun | |||
| Fæddur | 28. júlí 1952 | |||
| Bangkok, Taílandi | ||||
| Undirskrift |  | |||
| Konungsfjölskyldan | ||||
| Faðir | Bhumibol Adulyadej | |||
| Móðir | Sirikit | |||
| Eiginkonur | Soamsawali Kitiyakara (g. 1977; skilin 1991) Yuvadhida Polpraserth (g. 1994; skilin 1996) Srirasmi Suwadee (g. 2001; skilin 2014) Suthida Tidjai (g. 2019) | |||
| Börn | 8 | |||
Maha Vajiralongkorn Bodindradebayavarangkun (taílenska: มหาวชิราลงกรณ บดินทรเทพยวรางกูร; f. 28. júlí 1952), einnig þekktur undir konungsnafninu Rama 10., er núverandi konungur Taílands. Hann er eini sonur konungsins Bhumibols Adulyadej og drottningar hans, Sirikit.
Æviágrip
[breyta | breyta frumkóða]Maha Vajiralongkorn fæddist árið 1952 í Dusit-konungshöllinni í Bangkok. Mestalla ævi sína hefur hann lifað í skugga föður síns, hins geysivinsæla Bhumibols Adulyadej Taílandskonungs. Hann hlaut undirstöðumenntun ásamt þremur systrum sínum í hirðskóla í Chitriada-höll í Bangkok en gekk síðan í skóla á Englandi, fyrst í konunglega skólann í Sussex og svo í Millfield-skólann í Somerset. Árið 1970 var Vajiralongkorn sendur í konunglegan skóla í Sydney í Ástralíu og var hann þar í eitt ár þar til hann útskrifaðist loks frá hernaðarskóla í Duntroon í Kanada.[1]
Sem krónprins naut Vajiralongkorn aldrei vinsælda á við föður sinn, sem Taílendingar nánast tilbáðu sem guð. Vajiralongkorn hefur ávallt haft orð á sér fyrir að vera óútreiknanlegur „vandræðagemsi“ og framkoma hans hefur oft vakið hneyksli. Árið 1996 hengdi hann til dæmis tilkynningu upp á veggi konungshallarinnar í Bangkok þar sem hann sakaði þáverandi eiginkonu sína og barnsmóður opinberlega um framhjáhald.[2] Um aldamótin var jafnvel óttast að uppreisnarástand gæti skapast ef Vajiralongkorn tæki við ríkinu eftir föður sinn.[3]
Árið 2009 birti Wikileaks myndband af krónprinsinum að halda veglega afmælisveislu fyrir púðluhundinn sinn, Fúfú. Á myndbandinu sést Vajiralongkorn ásamt nakinni þáverandi eiginkonu sinni mata hundinn á stærðarinnar afmælistertu á meðan einkennisklæddir þjónar stjana við þau.[4] Hundurinn Fúfú hafði einnig verið sæmdur tign yfirmarskálks í taílenska flughernum.[5]
Vajiralongkorn varð konungur þegar faðir hans lést eftir sjötíu ára valdatíð sína í október árið 2016. Hann tók þó ekki við völdum og skyldum konungsembættisins fyrr en ári síðar þar sem hann vildi tíma til þess að syrgja föður sinn.[6]
Þann 1. maí árið 2019 kvæntist Vajiralongkorn lífverði sínum, konu að nafni Suthidu Tidjai.[7] Suthida varð formlega drottning Taílands næsta dag.[8] Fáeinum dögum síðar, þann 4. maí, var Vajiralongkorn formlega krýndur konungur Taílands í þriggja daga langri krýningarathöfn.[9]
Tilvísanir
[breyta | breyta frumkóða]- ↑ „Rétt eins og í „Þúsund og einni nótt"“. Vísir. 28. desember 1972. Sótt 17. febrúar 2019.
- ↑ „Bhumibol konungur og hans slekti“. Dagur. 15. febrúar 1997. Sótt 16. febrúar 2019.
- ↑ „Trúin er snar þáttur í lífi Taílendinga“. Lesbók Morgunblaðsins. 13. mars 1999. Sótt 16. febrúar 2019.
- ↑ „Suppressed video of Thai Crown Prince and Princess at decadent dog party“ (enska). WikiLeaks.
- ↑ Andrew MacGregor Marshall (5. febrúar 2015). „Thai crown prince's poodle, Air Chief Marshal Foo Foo, has been cremated“ (enska). The Guardian. Sótt 17. febrúar 2019.
- ↑ „Biðtími krónprinsins teygist á langinn“. Fréttablaðið. 19. október 2016. Sótt 16. febrúar 2019.
- ↑ „Kvæntist lífverði sínum“. mbl.is. 2. maí 2019. Sótt 2. maí 2019.
- ↑ „Suthida orðin drottning í Taílandi“. RÚV. 2. maí 2019. Sótt 2. maí 2019.
- ↑ „Fjallið sem varð að kórónu“. mbl.is. 4. maí 2019. Sótt 7. maí 2019.
| Fyrirrennari: Bhumibol Adulyadej |
|
Eftirmaður: Enn í embætti | |||