Útdráttur
Útdráttur er stutt lýsing eða samantekt á tilteknu gagni, oftast á fræðilegu efni, s.s. tímaritsgreinum, ritgerðum eða fræðibókum. Markmiðið er að veita lesandanum snögga yfirsýn á efninu, honum til glöggvunar, án þess þó að hann þurfi að lesa allt efnið til þess að átta sig á innihaldi þess. Útdráttur á því að geta staðið sjálfstæður, sem eins konar kjarnyrt, samanþjöppuð útgáfa af heildarefninu.
Í fræðilegum gagnasöfnum geta útdrættir verið ákaflega mikilvægir því leitarvélar sumra fræðilegra gagnagrunna vinna einvörðungu leitarorð úr útdráttunum en ekki aðalefninu.
Lengd útdrátta getur verið breytileg, margir útgefendur tilgreina á bilinu 100 til 500 orð, sjaldan meira en sem nemur einni blaðsíðu. Í útdrættinum kemur jafnan fram:
- Viðfang rannsóknarinnar
- Aðferðafræði sem notuð var við rannsóknina
- Helstu niðurstöður rannsóknarinnar
- Ályktanir dregnar af niðurstöðunum
Í sumum íslenskum fagtímaritinum, og á öðrum tungumálum, tíðkast að hafa sérstakan útdrátt á ensku. Í íslenskum háskólum er farið fram á að lokaritgerðir innihaldi útdrætti.
