Muzeo de Young
La Muzeo de Young esas muzeo di bel-arto en San Francisco, Kalifornia.
Situita en Parko Golden Gate, ol esas kompozanto dil Muzei di Bel-Arto di San Francisco, kun la Legion of Honor. La muzeo de Young nomizesas pro la jurnalestro di San Francisco, M. H. de Young.
La muzeo recevis 797.444 vizitanti en 2022.
La muzeo apertesis en 1895 en un ek l'edifici originale konstruktita por la California Midwinter International Exposition di 1894. L'edifico esis egiptianatra strukturo quo esabis la belarto-edifico che la ferio. L'edifico grave domajesis dal tertremo di 1906 en San Francisco, e klozezis dum yaro e duimo por repari. Ante longe, la gradopa developo dil muzeo postulis nova spaco por plu bone servar sua kreskanta vizitantaro. Michael de Young respondis per projetar l'edifico qua servis kom la kerno dil muzeo tra la 20ma yarcento. Louis Christian Mullgardt dizignis l'edifico en stilo hispanatra. La nova strukturo kompletigesis en 1919 e formale transferesis dal de Young al komisarii dil urbo. En 1921, de Young adjuntis centrala parto, kun turmo qua divenis la signaturo-saliajo dil muzeo, e la muzeo komencis asumar la bazala formo quan ol retenis til 2000. L'esforci da de Young honorizesis per la chanjo dil nomo dil muzeo al Memorala Muzeo M. H. de Young. Plusa adjunturo, westala alo, kompletigesis en 1925, la yaro dum qua de Young mortis. En 1929 l'original egiptianatra edifico deklaresis kom nesekura e demolisesis.
La muzeo de Young estalas usana arto del 17ma til la 21ma yarcenti, internaciona nuntempala arto, texuri e kostumi, ed arto de Amerika, Oceania ed Afrika. Kolekturi vizitebla che la muzeo de Young inkluzas: Usana Arto, Afrikana Arto, Oceaniana Art, Arto di Amerika, Kostumo- e Texuro-Arto, Grafika Arto, Fotografio e Skulturo. Parto del kolekturo esas acesebla enrete che la retosito dil muzeo e Google Arts and Culture.
La nuna edifico kompletigesis dal arkitekti Jacques Herzog, Pierre de Meuron e Fong Chan ed apertesis ye 15ma oktobro 2005. Strukturala, civila e geoteknikala injenior-arto provizesis da Rutherford & Chekene; Arup provizis mekanikal ed elektral injenior-arto. Herzog & de Meuron ganis la konkurso en januaro 1999 vinkante altra arkitekti Tadao Ando ed Antoine Predock. L'aktiveso terenala e sismala en San Francisco pozis problemo por la dizigneri Herzog & de Meuron e la precipua arkitekti Fong & Chan. Por helpar rezistar futura tertremi, “[la edifico] povas movar til 91 centimetri pro sistemo quo absorbas cinetika energio e konvertas ol aden varmeso”.