Monteriggioni
Monteriggioni esas komono en la provinco Siena en la italiana regiono Toskania.
Ol havas frontieri kun la komoni Casole d'Elsa, Castellina in Chianti, Castelnuovo Berardenga, Colle di Val d'Elsa, Poggibonsi, Siena e Sovicille. L'urbo esas arkitekturale e kulturale signifikanta; ol havas plura "piazza" (placi), e referesas en la Divina Commedia da Dante Alighieri.
Monteriggioni esas mezepokala murizita urbo, situita sur naturala kolineto, konstruktita da la Sienani inter 1214-19 kom fronto en lia militi kontre Firenze, per domincar la Via Cassia tra la Val d'Elsa e Val Staggia weste. Dum la konflikti inter Siena e Firenze dum la Mezepoko, l'urbo strategiale lokizesis kom defensiva fortifikuro. Ol anke rezistis multa ataki de e Firenzeani, e l'armei dil Episkopo di Volterra. En 1554 la Sienani konfidis l'urbo-garnizono a Giovannino Zeti, qua exilesabis de Firenze. En 1554, kom ago di rikoncilio kun le Medici, Zeti simple transdonis la urbo-klefi a la Medici-armei - egardita kom "granda trahizo" dal urbani.
La cirkume cirkulala muri, qui havas tota longeso de cirkume 570 metri e sequas la naturala konturi dil kolino, konstruktesis inter 1213 e 1219. Esas 14 turmi sur quadrata bazi equidistanta, e du portali o pordegi. Un pordego, la Porta Fiorentina regardas vers Firenze norde, e l'altra, la Porta Romana, regardas Roma sude. La chefa strado interne dil muri konektas la du pordegi en cirkume rekta lineo.
La chefa placo, la Piazza Roma, dominacesas da Romanatra kirko kun simpla fasado. Altra domi, ula en Renesanco-stilo (olim proprietita da lokala nobeli, borgezi e richa komercisti) cirkondas la placo. De la chefa placo plu mikra stradi duktas a publika gardeni, qui cirkondesas dal altra domi e komerceti dil urbo. Dum plu enemikal epoki, ta gardeni provizis necesa susteno kande enemiki asemblis su extere.
Altra vidindaji en la cirkondanta ruro inkluzas:
- Abadeyo di Santi Salvatore e Cirino, ye Abbadia Isola, Romanatra abadeyo de la meza-12ma yarcento
- Romanatra kirko di San Lorenzo a Colle Ciupi
- Romanatra Pieve (kirko) di Santa Maria a Castello, konocata depos la yaro 971
- Romanatra-Gotika ermiteyo di San Leonardo al Lago
- Villa Santa Colomba