José Serra
| José Serra | ||
| ||
| Profesiono: | politikisto | |
| Lando: |  Brazilia
| |
| Naskodato: | 19 di marto 1942 | |
| Nasko-loko: | Sao Paulo, Sao Paulo | |
José Serra (n. en 1942) esas Braziliana politikistulo. Il esis urbestro di Sao Paulo de 2005 til 2006, e guberniestro di Sao Paulo de la 1ma di januaro 2007 til la 31ma di marto 2010.
Biografio
[redaktar | redaktar fonto]Naskinta en Sao Paulo ye la 19ma di marto 1942 il komencis studiar injeniorarto en 1960. Balde il eniris en studentala movadi, ed eniris la Juventude Universitária Católica - JUC ("katolika universitatala yuneso"). En 1962 il helpis fondar la politikala grupo Ação Popular - AP ("popula agado"), qua havis ideologiala influi de Teilhard de Chardin ed altra katolika pensisti e deziris krear un "homala socialismo".
Kun la stato-stroko di 1964 en Brazilia il fugis a Bolivia, pose a Francia e fine establisis su en Chili, ube vivis til 1973. Kun Chiliana stato-stroko ta yaro, il refujis en Italiana ambasadeyo, e pos obtenis exilo en Usa, ube il studiis ekonomiko, ed obtenis lia doktoreso en 1977.
Sama yaro il retroiris a Brazilia ed probis elektesar kom federala deputato, ma lia politikala yuri esis suspensita da militarala guverno, til l'amnistio en 1979. Il divenis profesoro di l'universitato di Campinas e verkis ibe til 1983.
Kande Franco Montoro divenis guverniestro di Sao Paulo ye 1983 il indikis José Serra kom lia Sekretario por Financo. En 1986 Serra esis elektita federala deputato kom reprezentero di Sao Paulo stato, ed ye 1994 il esis elektita por senato ed esis senatano de 1 di januaro 1995 til 31 di decembro 2002.
Ye 2002 il decidis esar kandidato a Braziliana prezidanteso kun la suporto di Braziliana social-demokrata partiso - PSDB - ma perdis l'elekto vice Luiz Inácio Lula da Silva. En 2010 il itere esis kandidato a la prezidanteso, ma Dilma Rousseff elektesis.
Il esas mariajita kun la Chiliana psikologiistino Sylvia Mónica Allende Serra.