Batalio di Balaklava
| Batalio di Balaklava | |||
| |||
| Atako da Lejera Brigado. | |||
| Konflikto: | Milito di Krimea | ||
| Dato: | 25ma di oktobro 1854 | ||
| Loko: | proxim Kadikoi e Balaklava, Krimea, Rusa imperio | ||
| Rezulto: | nedecidiva | ||
| Unionita Rejio Otoman imperio Duesma Franca imperio |
↔ | Rusa imperio | |
| Barono Raglan François Certain de Canrobert |
↔ | Pavel Liprandi | |
| 20 mil Britaniani kun 41 kanoni 7 mil Franci 1000 Turki |
↔ | 25 mil soldati 78 kanoni | |
| 615 | ↔ | 627 | |
La batalio di Balaklava, eventinta ye la 25ma di oktobro 1854 proxim urbo Balaklava, esis batalio en qua Rusa trupi luktis kontre Turki, Franci e Britaniani, qui federis dum la milito di Krimea, de 1854 til 1856. En Rusa kulturo, ol konocesas kom batalio di Kadikoi, vilajo plu proxima a la loko di la batalio. L'agado eventis dum siejo dal federiti kontre urbo Sevastopol, probante impedar ke Rusi ruptus la siejo e neutrigus la loko uzita dal federiti por recevar suplei.
La batalio
[redaktar | redaktar fonto]Ye la 25ma di oktobro establisesis kontato inter Rusa trupi ed enemiki. Spionisti raportis a federiti ke Rusa trupi esis plu granda, do dum matinala krepuskulo sendesis batalio-komandi al Angla trupi qui siejabis Sevastopol. Tamen, Angli tardigis marchar, e facis nulo dum la batalio. Lua komandero, qua ne suspensis sua dejuneto por marchar, kritikesis pose.
Dum la batalio eventis remarkinda fakti por militala historio, exemple la famoza «Atako da lejera brigado» e tale nomizita «Tenua lineo reda» (The Thin Red Line), kande la 93ma Regimento Highlander haltis atako da Rusa kavalrio, kun nur du sucedanta linei di soldati. Tamen, ca batalio esas famoza pro lua polemikala lasta agado: l'atako surnomizita Atako da lejera brigado, qua rezultis katastrofoza masakro di Britaniana soldati.
Konocata kom "kavalkado vers l'inferno", ol eventis kande tota Kavalrio-Diviziono komandita da George Charles Bingham, la 3ma komto Lucan, atakis poziciono okupita da Rusa artilrio, an la fino di valo profunda de 1,5 kilometri, protektita da plusa artilriani ed infantriani lokizita sur la bordi di kolini qui cirkondis ol. Poke pos komencar l'avanco, la Grava Brigado, qua marchis dope, interuptis l'atako pos decido da Lord Lucan, kande ilu perceptis ke ol esis nerealigebla. Malgre to, la Lejera Brigado komandita da James Thomas Brudenell, komto de Cardigan, avancis direte sen questionar l'impero recevita unfoye pos ke l'avanco komencis. La Lejera Brigado ne recevis impero por abortar l'atako o retretar. La polemikal agado da Lucan (akra enemiko de Cardigan) pri ne haltar l'atako duras esar misterioza. On kredas ke Lucan probable deziris montrar kurajo e superirar l'imajo pri deskurajo e pasiveso di la kavalrio, od anke ke ilu deziris montrar la nekompetenteso di Raglan.
Dum la kavalkado, la Brigado expozesis ad ataki per grenadi e musketi tam intensa, ke la morto-statistiko di homi e kavali esis enorma. Tamen, la Brigado restis serena, e mantenis marcho segun la disto kalkulita por atingar la skopo sen exhaustar l'animali, to signifikis kurar nur kande la emo esis sat proxima, poke distanta de kanoni. Altralatere, Rusi kalkulis ke li haltus la Brigado kun feroca artilrial atako, ed inkluzite povus lansar la lasta kanono-pafadi sen netigar kanoni, e poka sekundi ante l'arivo di la kavalrio, por mortigar la maxim multa atakeri (ne netigar kanoni esis agado riskoza, pro ke povus eventar acidenti mortigiva por artilriani).
Malgre omno, transvivinti de la Brigado sucesis superpasar la kanono-lineo Rusa, tamen li renkontris surprizo: li atakesis da kavalriani Rusa e da kozaki, qui stacis dope la lineo di kanoni, e superiris la quanto di atakeri per 5 kontre 1. Fine, Rusi sucesis ruptar Britaniana linei pos vidar la poka quanto di Britaniani qui esis videbla meze la fumo de la kanoni. La cetera transvivinti de la Lejera Brigado komencis infernala retreto meze bombardo veninta de Rusa pozicioni sur vicina kolini. Fine, Rusi retretis de la proximeso di Balaklava, judikanta la batalio kom vinko sua. Tamen, segun strategiala vidopunto, federiti duris mantenar lia pozicioni cirkume Sevastopol. Pro to, la rezulto di la batalio anke povas judikesar kom favorebla a li.