Cocaina

Cocaina, etiam cognoscite como coca, coke, blanca, e nive, es un stimulante potente que on usa principalmente como un droga recreational. Illo es frequentemente administrate per le naso, inhalate como fumo, o injectate in le venas como un solution. Le effectos mental pote includer euphoria, agitation, o psychose. Le symptomas physical pote includer un pulso rapide, sudation, e pupillas grande. Grande doses pote resultar un multo alte pression arterial o temperatura de corpore. Le effectos comencia post secundas o minutas e dura inter cinque e novanta minutas.

Cocaina pote resultar narcomania a causa de su effectos al via mesolimbic in le cerebro. Post un curte duration de usar il ha un alte risco que le dependentia occurrera. Su usar etiam augmenta le risco de colpo de apoplexia, attacco cardiac, problemas pulmonari in le homines qui lo fuma, infectiones sanguinari, e arrestation cardiac. Le cocaina illegalmente vendite es frequentemente miscite con anestheticos local, fecula de mais, quinina, o sucro, que pote augmentar le toxicitate. Post doses iterate un persona pote suffrer un habilitate decrescite pro sentir placer e esser multo fatigate.

Cocaina age per inhibition del recaptura de serotonina, noradrenalina, e dopamina. Isto resulta in concentrationes plus grande de iste tres neurotransmissores in le cerebro. Illo pote transversar facilemente le barriera hemato-encephalic e pote conducer al collapso del barriera. Cocaina es un substantia naturalmente occurrente trovate in le planta coca que on cultiva principalmente in America del Sud. In 2013, 419 kilogramos era producite legalmente. Il es estimate que le mercato illegal pro cocaina es 100 a US$500 milliardo annualmente. Con processamento additional on pote producer un forma fumabile, crack, ex cocaina.

Cocaina es le droga le secunde plus frequentemente usate globalmente post cannabe. Inter 14 e 21 million homines usa le droga in cata anno. Le uso es le plus frequente in America del Nord, sequite per Europa e America del Sud. Inter un e tres per cento del homines in le mundo disveloppate ha usate cocaina a alicun parto de lor vita. In 2013 le uso de cocaina directemente resultava in 4,300 mortes, accrescite ex 2,400 in 1990. Le folios del planto coca se usa del peruanos depost tempores ancien. On originalmente isolava cocaina ex le folios in 1860. Depost 1961 le international Convention unic super le stupefacentes ha requirite que paises face le uso recreational de cocaina un crimine.