Լևոն Ղալումյան

Լևոն Ղալումյան;
Ծնվել է	հունիսի 25, 1940
Ծննդավայր	Երևան, Հայկական ԽՍՀ, ԽՍՀՄ
Մահացել է	օգոստոսի 28, 2017 (77 տարեկան)
Վախճանի վայր	Լոս Անջելես, Կալիֆոռնիա, ԱՄՆ
Կրթություն	ՀԱՊՀ (1964)
Աշխատավայր	Երևաննախագիծ
Պարգևներ	Հայաստանի վաստակավոր ճարտարապետ և
Անդամություն	Հայաստանի ճարտարապետների միություն
	Levon Ghalumyan Վիքիպահեստում

Լևոն Մամիկոնի Ղալումյան (հունիսի 25, 1940(1940-06-25), Երևան, Հայկական ԽՍՀ, ԽՍՀՄ - օգոստոսի 28, 2017(2017-08-28), Լոս Անջելես, Կալիֆոռնիա, ԱՄՆ), հայ ճարտարապետ, Հայաստանի Հանրապետության վաստակավոր ճարտարապետ (մայիսի 24, 2010)։ Հայաստանի ճարտարապետների միության անդամ (1972)։

Կենսագրություն

1964 թվականին ավարտել է Երևանի պոլիտեխնիկական ինստիտուտը։

1964 թվականից աշխատում է Երևաննախագիծ ինստիտուտում, 1985-1997 թվականներին և 2001 թվականից՝ ճարտարապետության արվեստանոցի ղեկավար, 1997-2001 թվականներին՝ տնօրեն։

2002 թվականին հիմնել է «Արխիտոն» ՍՊ ընկերությունը։

Լևոն Ղալումյանի նախագծերով են կանգնեցվել Նալբանդյան գյուղում՝ Հայրենական պատերազմում (1941-1945) զոհված մարտիկների (1972, քանդակագործ՝ Նիկողայոս Նիկողոսյան), Ստեփանակերտում՝ Ալեք Մանուկյանի (1999, քանդակագործ՝ Տիգրան Արզումանյան), Երևանում՝ Վիլյամ Սարոյանի կիսանդրին (իր անվան դպրոցի առջև, քանդակագործ՝ Տիգրան Արզումանյան, 2000), Անդրեյ Սախարովի հուշարձանը Երևանում (քանդակագործ՝ Տիգրան Արզումանյան, 2001, Ավագ Պետրոսյանի հուշարձանը Երևանում, 2014, (քանդակագործ՝ Տիգրան Արզումանյան)։

Ռուզան Ալավերդյանի համահեղինակությամբ կառուցվել է Խնկո Ապոր անվան հանրապետական մանկական գրադարանը (1978, ՀԼԿԵՄ մրցանակ՝ 1981), «Հայպետհողշիննախագիծ» ինստիտուտը, Առաջին ատյանի դատարանի շենքը Երևանում, Ստեփանակերտի թատրոնի շենքի նախագիծը, «Հայերկրաբանություն» թանգարանը (1986), 1988 թվականի երկրաշարժից հետո Գյումրիի վերականգնման համար կազմել է Մարմաշենի շրջանի մանրամասն հատակագծման (1989-1990) և կառուցապատման (1990-1991), Ամերիկյան Կարմիր խաչի կառուցած բնակելի թաղամասի (1990-2001), Երևանի թիվ 13 միջնակարգ դպրոցը (1992, Միջազգային ճարտարապետական ակադեմիայի մրցանակ), քաղաքային և գյուղական համայնքների գլխավոր հատակագծեր (Ջերմուկ, Արզնի, Սևան, Եղվարդ, Ծաղկաձոր, Նոյեմբերյան, Իջևան, Դիլիջան, Բերդ և այլն), բազմաֆունկցիոնալ կառույց Երևանի Հյուսիսային պողոտայում, «Անի» և «Մուշ-2» թաղամասերի նախագծերը, Սպիտակ քաղաքի «Վարպետաց թաղամաս»-ի նախագիծը (2010-2012), «Երազ» բնակելի թաղամասի գլխավոր հատակագիծը և 18-հարկանի բազմաֆունկցիոնալ բնակելի շենքերի առաջին համալիրը (2008-2012)։

Ղալումյանի նախագծերով են կառուցվել նաև.

Բնակելի շենք Մամիկոնյանց 38 հասցեում (13-հարկանի)
Բնակելի շենք Կիևյան 14ա հասցեում (16-հարկանի)
Բնակելի շենք Դավթաշեն 33/1 հասցեում (16-հարկանի)
Բնակելի շենքեր Գյումրիի «Անի» և «Մուշ-2» թաղամասերում, Ախուրյան քաղաքում (4-հարկանի)
Բնակելի շենք Մանանդյան 41/3 հասցեում (վերակառուցում)
«Միկա» մարզադաշտի արևելյան տրիբունայի ծածկը։

Հեղինակ է Արաբկիր և Շենգավիթ համայնքների գոտեվորման նախագծերի, Տաթևի վանական համալիրին հարող քաղաքաշինական գործունեության հատուկ կարգավորման օբյեկտի տարածքային կազմակերպման նախագծի (2013)։

2011 թվականին Երևանում տեղադրված Ալեքսանդր Մանթաշյանի հուշարձանի ճարտարապետն է, քանդակագործ՝ Տիգրան Արզումանյան^[1]։
2013 թվականին մասնակցել է «Համազգային» պետական թատրոնի շենքի նախագծի բաց մրցույթին և արժանացել առաջին մրցանակի^[2]։

Պարգևներ և մրցանակներ

ՀԼԿԵՄ մրցանակ (1981)
«Տարվա լավագույն կառույց» միջազգային ճարտարապետական ստուգատեսի դափնեկիր (1995)
Միութենական և հանրապետական մրցույթների դափնեկիր
Գերմանիայի տրանսպորտի և շինարարության նախարարության մրցանակ՝ Ջերմուկ և Արզնի քաղաքների գլխավոր հատակագծերի մշակման համար (2005)
Հայաստանի Հանրապետության վաստակավոր ճարտարապետ (2010)^[3]։
ՀՀ վարչապետի հուշամեդալ (2015)։

Պատկերասրահ

Խնկո-Ապոր անվան ազգային մանկական գրադարան
Շենք Հյուսիսային պողոտայում
Շենք Հյուսիսային պողոտայում
Անդրեյ Սախարովի հուշարձանը Երևանում
Անդրեյ Սախարովի հուշարձան
«ՄԻԿԱ» մարզադաշտի արևելյան տրիբունայի ծածկը
Երկրորդ աշխարհամարտում զոհվածների հուշարձան Արմավիրի մարզի Նալբանդյան գյուղում, քանդակագործ՝ Նիկողայոս Նիկողոսյան, ճարտարապետ՝ Լևոն Ղալումյան
Վկայագիր Ջերմուկ քաղաքի գլխավոր հատակագծի համար
Վկայագիր Արզնի քաղաքի գլխավոր հատակագծի համար