Ami Chandra

**Ami Chandra**
Ami Chandra
	Ami Chandra
Janam	1900; India
Maut	13 March 1954; Singapore
Citizenship	Fiji citizen
Jaati	Hindustani
Citizen	Fiji citizen
Parrhai	B. A. Gurukul, Kangri, India
Parrhai ke jagha	Gurukul, Kangri, India
Kaam	Politician, Teacher, Union ke neta
Kaam ke saal	1927 - 1954
Jaana jaawe hae	Legislative Council ke member, 1947 - 1950, Fiji me Hindustani ke parrhae, Ba Soccer Association ke suruu kare waala, Fiji Trades Union Congress ke pahila pardhaan
Padwi	Pandit
Term	Legislative Council; (1947-1950)
Board ke member	Radio Fiji
Dharam	Hindu (Arya Samaji)
Aurat/ Admii	Sarvati Devi
Larrkan	Saroj, Jyan, Pushpa aur Om
Awards	Dayanand Medal for Meritorious Service; Vidyalankar

Pandit Ami Chandra Vidyalankar (1900 - 13 March 1954), Fiji ke ek sikchhak, union leader, soccer ke administrator aur Legislative Council ke member rahaa. Panditji, Fiji 1927 me, Arya Samaj ke school me parrhae khatir, aais rahaa. Uu Ba aur Suva me nawaa school bhi suruu karis rahaa aur Fiji ke Hindustani ke Hindi sikhe khatir saral Hindi me Class 1-4 khatir book bhi likhis rahaa. Uu CSR (Colonial Sugar Refining Company) ke gora kulambar logan ke Hindi bhi parrhaes rahaa. Uu scouting aur football me bhi rahaa aur Ba Indian Football Association ke suruu karis rahaa. Uu Fiji Teaches Union ke bhi suru karis rahaa aur ii biswwas karat rahaa ki politics aur union ke alag rahe ke chaahi iske khatir uu 1952 me Fiji Industrial Workers Congress suruu karis rahaa. Uske union ke biich me samjhauta karae ke khatir bhi balawa jaawat rahaa.^[1] Sarkar uske aadar karat rahaa aur Legislative Council me uske nominate bhi karis rahaa.

Sikchha me yogdaan

Panditji, Gurukul, Kangri, India ke graduate rahaa, aur jab 22 December 1927 ke uu Fiji pahucha tab uske Suva Town Hall me barraa swagat karaa gais rahaa. Panditji Saweni, Lautoka me Gurukul Primary School me parrhae ke suruu karis. 1928 me uu Principal banis aur uske niche boarding school suruu karaa gais jisme 45 larrkan rahat rahin, jab ki school me kul jorr 140 students log parrhat rahin jisme 25 Kaiviti bhi rahin. Uske achchha kaam ke khatir Governor, Sir Murchison Fletcher se bhi badhaai mila

1930 me uu Suva gais aur Arya Samaj Girls School ke Samabula me suruu karis. Baad me uu Ba gais aur Arya Kanya Pathshala ke suruu karis. 1950 me uu post primary classes Ba me suruu karis jon ki aage chal ke, 1952 me, Dayanand Ango Vedic College of Ba ban gais.

Ba me Panditji ke Colonial Sugar Refining Company (CSR) uske kulambar logan ke Hindi parrhae ke khatir madat magis. Uske Fiji me sikchha ke sab se barraa yogdaan Hindi Ki Pothi rahaa jisse Fiji ke Hindustani larrkan logan Hindi saralta se sikhe sakin.

Union leader

Panditji 1929 me Fiji Teachers Union suruu karis rahaa aur iske pahila President bhi rahaa.^[2] Uu bahut union ke leader ke madat karis rahaa aur Chini Mazdur Sangh aur Gold Mine Workers Union ke suruu kare me madat karis rahaa.^[3] Uske Fiji ke sab logan biswas karat rahin aur jab 1943 me Kisan Sangh dui gut me split hoe gais rahaa tab duuno side Panditji ke Sangh ke book audit kare khatir raaji bhay rahin. Uu Fiji Industrial Workers Congress (jon kis aaj Fiji Trades Union Congress hae) ke president bhi rahaa. Uu multi-racial trade union ke support karis aur trade union ke politics me part le ke virod karat rahaa.^[4]

Ba Football Association

1935 me, CSR ke madat se Panditji Ba Indian Football Association suruu karis rahaa jisme 1940 talak chaar team league tournament me khelat rahin.^[5]

Legislative Council ke member

1947 se 1950 talak Panditji Legislative Council ke ek nominated member rahaa aur uu Vishnu Deo ke saathe kaam karis.

Panditji ke yaad

Panditji 13 March 1954 ke Singapore me ek plane ke gir jaae se maris (maut/ dead) raha, jab uu England jaawat rahaa British Trades Union Congress se mile. 28 August 1956 ke, Arya Samaj ke Golden Jublee celebtation ke time uske Dayanand Medal (mare ke baad) mila. 1957 me, Tawakubu, Lautoka ke log uske yaad me ek school, Ami Chandra Memorial School, suruu karin.^[6] Panditji ke saadi Sarvati Devi ke saathe bhais rahaa aur uske paas chaar larrkin Saroj, Jyan, Pushpa aur Om rahin.^[7]

References

↑ Kanwal, Jogindar Singh (1980). A hundred years of Hindi in Fiji. Suva, Fiji: Fiji Teachers Union. p. 79.
↑ Sharma, Guru Dayal (1987). Memories of Fiji: 1887 - 1987. Guru Dayal Sharma, Suva, Fiji. p. 182.
↑ Sir Vijay R. Singh, Speaking Out, Knightsbrook Publications, 2006, ISBN 0-97775166-0-1
↑ Industrial associations and local politics.
↑ M. Prasad, Sixty Years of Soccer in Fiji 1938 – 1998: The Official History of Fiji Football Association, Fiji Football Association, Suva, 1998
↑ Fiji Times, 4 March 1955
↑ "Pandit Ami Chandra Family", pp. 59.

Fiji ke Hindustani

Leader − Politician (1929-1971) − Politician (1972-1987) − Politician (1992-1998) − Politician (1999-2006) − Politician (2014- ) − Political Activist − Khel kuud − Government Service − Social Service − Education − Dharam − Businessman − Unionist − Writer

Totaram Sanadhya − Manilal Doctor − Vashist Muni − Badri Maharaj − Vishnu Deo − Ami Chandra − A. D. Patel − Ayodhya Prasad − Muhammed Twahir Khan − Sadhu Kuppuswami − Swami Rudrananda − B. D. Lakshman − M. N. Naidu − S. M. Koya − Vijay R. Singh − Jai Ram Reddy − Harish Sharma − Mahendra Chaudhry − M.S. Sahu Khan − Aiyaz Sayed-Khaiyum

[1] Kanwal, Jogindar Singh (1980). A hundred years of Hindi in Fiji. Suva, Fiji: Fiji Teachers Union. p. 79.

[2] Sharma, Guru Dayal (1987). Memories of Fiji: 1887 - 1987. Guru Dayal Sharma, Suva, Fiji. p. 182.

[Vijay_R._Singh_2006-3] Sir Vijay R. Singh, Speaking Out, Knightsbrook Publications, 2006, ISBN 0-97775166-0-1

[4] Industrial associations and local politics.

[5] M. Prasad, Sixty Years of Soccer in Fiji 1938 – 1998: The Official History of Fiji Football Association, Fiji Football Association, Suva, 1998

[6] Fiji Times, 4 March 1955

[7] "Pandit Ami Chandra Family", pp. 59.

[1]

[2]

[3]

[4]

[5]

[6]

[7]