Rhynchopus

Rhynchopus
Clasificación científica
Dominio: Eukaryota (sen clasif.) Excavata Filo: Euglenozoa Clase: Diplonemea Orde: Diplonemida Familia: Diplonemidae Xénero: Rhynchopus Skuja 1948
Especie tipo
Rhynchopus amitus Skuja 1948
Especies
R. amitus Skuja 1948 R. coscinodiscivorus Schnepf 1994 R. euleeides Roy et al. 2007 R. humris Tashyreva et al. 2018 R. littoralensis Kufferath 1950 R. serpens Tashyreva et al. 2018

Rhynchopus é un xénero de protistas escavados flaxelados da clase Diplonemea. Normalmente teñen flaxelos de diferentes lonxitudes e unha soa abertura subapical coas aberturas do peto flaxelar e o aparato alimenticio adxacente que se funden nunha soa estrutura. Cando escasea o alimento, prodúcense células flaxeladas móbiles, o que suxire a presenza dunha fase dispersiva completamente flaxelada no seu ciclo vital, o que serve para distinguir os xéneros Rhynchopus e Diplonema. A maioría das especies son de vida libre, outras son simbiontes e R. coscinodiscivorus é un parasito intracelular de diatomeas.

Especies

A especie tipo é R. amitus, que foi descrita no plancto do mar Báltico. Ten un corpo piriforme alongado, xeralmente máis cóncavo por un dos lados. Un disco separa o peto de inxestión do aparato flaxelar e un peto de dous flaxelos conforme emerxen da célula. Atopouse alimentándose do citoplasma de diatomeas planctónicas e en branquias de cangrexos e lagostas. Ademais dos estadios da fase móbil flaxelada, produce tamén un quiste.

R. euleeides é un flaxelado mariño de vida libre. No estadio trófico as células son predominantemente elípticas e aplanadas lateralmente, pero a miúdo cambian de forma. O escorregamento é a forma máis habitual de locomoción. Os dous flaxelos, que están normalmente agochados no peto subapical, son curtos e de lonxitude desigual e teñen axonemas convencionais, pero parecen carecer de barras paraxonemais. As células nadadoras, que só se ven ocasionalmente, son máis pequenas e teñen dous flaxelos conspicuos, dunha lonxitude máis do dobre que a do corpo.