Perper montenegrino

Perper montenegrino †
Billete de 20 perpera	100 perpera (1910)
Ámbito:	Principado de Montenegro. Reino de Montenegro.
Fracción:	1 perper = 100 para.
Moedas:	- 1, 2, 10, 20 para. - 1, 2, 5, 10, 20, 100 perpera.
Billetes:	1, 2, 10, 20, 50, 100 perpera.
Emisor:	Banco de Montenegro

O perper (en montenegrino: crnogorski perper, pl. perpera; en serbio cirílico: Црногорски перпер, pl. перпери) foi a unidade monetaria de Montenegro entre 1906 e 1918, dividido en 100 para.

Tomou a súa denominación dunha moeda habitualmente utilizada no Mediterráneo oriental a partir do século XVII, baseada na moeda bizantina hyperpyron, e que xa fora moeda do Imperio Serbio. En 1918 foi substituída polo dinar iugoslavo cando Montenegro pasou a formar parte do Reino dos Serbios, Croatas e Eslovenos.

Na derradeira década do século XX, as autoridades montenegrinas consideraron a posibilidade de retomar o perper como moeda do novo Estado independente, logo da disolución de Iugoslavia. Porén, finalmente se adoptou no seu lugar o marco alemán, posteriormente substituído polo euro.

En 2002, o Banco Central de Montenegro, en conmemoración do primeiro aniversario do seu establecemento, recuñou unha réplica da serie orixinal de moedas con valores en perper e para.

Moedas

En 1906 cuñouse na Casa da Moeda de Viena unha serie de moedas montenegrinas cos valores divisionarios de 1, 2, 10 e 20 para; as dúas primeiras de bronce e as outras dúas de níquel. A esta serie sumáronselle en 1909 as moedas de prata de 1 e de 5 perpera, e en 1910 as de 2 perpera. Neste último ano emitíronse tamén moedas de ouro de 10 e de 20 perpera, e unha tiraxe moi reducida (300 exemplares) de moedas de 100 perpera. As moedas de bronce e de prata reemitíronse en varias ocasións ata 1914.

10 para de 1906

A serie de ouro de 1910 emitiuse con dúas variantes: na primeira, as lendas aluden Nicolao I como príncipe e na segunda como rei de Montenegro. Isto débese a que o 28 de agosto de 1910 o príncipe Nicolao foi proclamado rei de Montenegro. Esta segunda serie conmemora, así mesmo, os cincuenta anos de Nicolao I ao principado.

Actualmente, as moedas de 100 perpera están consideradas como a expresión máis refinada da numismática montenegrina. Descoñécese que cantidade destas moedas se conserva, aínda que os numismáticos estiman que son arredor de 150 exemplares, entre os que se inclúen os existentes en coleccións tan importantes como as do Ermitage, a American Numismatic Society, o Departamento de Moedas e Medallas do British Museum ou a Colección Numismática Nacional dos Estados Unidos. Estímase que deben conservarse varios exemplares en coleccións privadas montenegrinas e outras dúas están expostas no Museo do Diñeiro do Banco Central de Montenegro. Nas poxas numismáticas, estas moedas acadan valores de entre 20.000 e 35.000 euros, en función do seu estado de conservación.

Todas as moedas montenegrinas de prata e de ouro con valor de 1 perper e superiores son obra do gravador Stephan Schwartz.

Valor	Imaxe		Metal	Diámetro	Peso	Canto	Anos
Principado de Montenegro
1 para			BR	17 mm	1,66 g	Liso	1906
2 para			BR	19 mm	3,3 g	Liso	1906 1908
10 para			NI	19 mm	3 g	Estriado	1906 1908
20 para			NI	21 mm	4 g	Estriado	1906 1908
1 perper			AG 835	24 mm	5 g	Estriado	1909
2 perpera			AG 835	27 mm	10 g	Lenda: *** БОГ * ЧУВА * ЦРНУ * ГОРУ	1910
5 perpera			AG 900	34 mm	24 g	Estriado	1909
10 perpera			AU 900	19 mm	3,38 g		1910
20 perpera			AU 900	21 mm	6,77 g		1910
100 perpera			AU 900	34,5 mm	33,87 g		1910
Reino de Montenegro
1 para			BR	17 mm	1,66 g		1913 1914
2 para			BR	19 mm	3,33 g		1913 1914
10 para			NI	18,5 mm	3 g	Estriado	1913 1914
20 para			NI	21 mm	4 g	Estriado	1913 1914
1 perper			AG 835	23 mm	5 g	Estriado	1912 1914
2 perpera			AG 835	27 mm	10 g	Con lenda	1914
5 perpera			AU 900	36 mm	24 g		1912 1914
10 perpera			AU 900	19 mm	3,38 g		1910
20 perpera			AU 900	21,1 mm	6,77 g	Con lenda	1910
100 perpera			AU 900	37 mm	33,87 g		1910

Billetes

En 1912 produciuse a emisión de billetes por parte do Tesouro de Montenegro composta polos valores de 1, 2, 5, 10, 50 e 100 perpera. En 1914, o Goberno emitiu unha segunda serie, composta polos mesmos valores, aos que se lles engadiu o de 20 perpera.

No transcurso da ocupación austríaca durante a primeira guerra munidal, as series emitidas anteriormente foron contraestampadas con cuños postos á man polos mandos do goberno do distrito militar. En 1917, o exército austríaco emitiu vales convertibles con denominacións en perpera (1, 2, 5, 10, 20, 50 e 100 perpera) e en coroas (kronen), coa taxa de cambio de 2 perpera = 1 krone.

O perper como moeda dixital

Artigo principal: Criptomoeda.

O perper dixital é unha moeda dixital descentralizada, carente dun banco central, e pode ser enviada de usuario a usuario na rede Peper peer-to-peer sen necesidade de intermediarios. As operacións son verificadas por nodos de rede a través da criptografía e rexístranse nun libro público distribuído chamado "cadea de bloques".

O perper dixital creouno en 2019 Aleksandar-Sasha Kapisoda, un científico especializado na tecnoloxía dixital pertencente a unha empresa farmacéutica alemá. Kapisoda decidiu retomar a antiga moeda do Reino de Montenegro actualizada á tecnoloxía do século XXI e cedeu ao Estado de Montenegro os dereitos da propiedade intelectual.

Véxase tamén

Bibliografía

• Cuhaj, G. et al. (2011). Standard Catalog of World Coins 1901-2000. 39ª ed. Krause Publications, Iola. ISBN 978-1-4402-1172-8
• Cuhaj, G. et al. (2008). Standard Catalog of World Paper Money. General Issues 1368-1960. 12ª ed. Krause Publications, Iola. ISBN 978-0-89689-730-4
• Frey, A. R. (1916). A dictionary of numismatic names; their official and popular designations. American Journal of Numismatics. Vol 50.
• Martinori, E. (1915). La moneta. Vocabolario generale Arquivado 20 de setembro de 2020 en Wayback Machine.. Roma. Istituto italiano di numismatica.

Outros artigos

• Hyperpyron

Ligazóns externas

• Vídeo: "From Perper to Euro". Banco Central de Montenegro
• Exposición: "From Perper to Euro". Museo do Diñeiro do Banco Central de Montenegro