Lume (bioloxía)

Para o lume da combustión ver lume. Para a unidade física de fluxo luminoso ver lumen.

Sección do tubo dixestivo co lume no centro.

Anatomía dunha arteria.

En bioloxía e anatomía, o lume (do latín lūmen, abertura ou luz), tamén chamado luz, é o espazo interior dunha estrutura tubular ou cavidade, como o dunha arteria ou o do intestino.

Por extensión, o lume pode ser tamén o espazo interno dun compoñente ou estrutura celular, como o retículo endoplasmático.

Moitos procedementos médicos realízanse accedendo polo lume dos vasos e órganos, como as endoscopias de estómago, vaxina, vexiga urinaria, colon etc. e certas operacións cirúrxicas como as anxioplastias e outras.

Diversos parasitos, como as lombrigas Ascaris, viven na luz dun órgano do seu hóspede.

Exemplos

• O interior dun vaso sanguíneo, é dicir, o espazo central dunha arteria ou vea polo cal flúe o sangue é o seu lume ou luz do vaso. As substancias que reducen a luz dun vaso denomínanse vasoconstritoras, e as que a aumentan, vasodilatadoras.
• O interior do tracto gastrointestinal (luz gástrica, lume duodenal etc.).
• As vías bronquiais dos pulmóns e demais vías aéreas.
• O interior dos túbulos renais.
• O interior da vaxina, útero, trompas de Falopio.
• Dentro dunha célula, o lume pode ser o espazo interno dun tilacoide, ou o do retículo endoplasmático, aparato de Golgi, lisosoma, mitocondria, microtúbulo, vesícula etc.