Le Monde diplomatique
| Fundación | Maio de 1954 |
|---|---|
| Xénero | Información xeral |
| País | Francia |
| Ámbito | Internacional |
| Lingua | Francés e outras. |
| Periodicidade | Mensual |
| Cor | En branco e negro e en cor |
| Fundador | Hubert Beuve-Méry |
| Director | Serge Halimi |
Le Monde diplomatique, chamado coloquialmente Le Diplo, é un xornal francés de periodicidade mensual fundado en maio de 1954 por Hubert Beuve-Méry a modo de suplemento para o diario Le Monde. Presenta unha liña editorial esquerdista, defendendo outro tipo de globalización e posicionándose a prol dos países do Terceiro Mundo.
Historia e características
[editar | editar a fonte]Está destinado aos círculos diplomáticos e ás grandes organizacións internacionais. Creouse por iniciativa dun antigo diplomático de orixe húngara reconvertido a xornalista, François Honti. Hoxe, enmárcase como filial cunha redacción independente dentro do grupo La Vie-Le Monde. En 2007, a tiraxe media da edición francesa roldaba os 240 000 exemplares, mentres que a tiraxe global das súas edicións internacionais impresas acadaba case os dous millóns e medio de exemplares.
Internacional
[editar | editar a fonte]A partir do final da década de 1970, Le Monde diplomatique comezou a ser editado tamén fóra de Francia. En 2010 o xornal conta con 68 edicións no estranxeiro[1], en 26 linguas, sendo 35 impresas e 33 electrónicas. De 500 mil exemplares en 1996, o total das edicións estranxeiras impresas pasou a 1,4 millón de exemplares en 2005.
O xornal aborda temas relacionados á Europa, á América Latina e ao Mundo Árabe. Alén dos artigos traducidos da edición francesa, até 20% das materias das edicións estranxeiras son elaboradas por redaccións locais.
Redacción
[editar | editar a fonte]En 2010, o director da publicación é Serge Halimi (anteriormente o director fora o galego Ignacio Ramonet), sendo o redactor xefe Maurice Lemoine e os seus adxuntos Martine Bulard, Philippe Río, Anne-Cécile Robert. Así mesmo, na redacción figuran Mona Chollet, Alain Gresh, Pierre Rimbert, Dominique Vidal e Laurent Bonelli.
