Kutxa
A Gipuzkoa eta Donostiako Aurrezki Kutxa (que significaría en éuscaro Caixa de Aforros e Monte da Piedade de Guipúscoa e Donostia) ou, simplemente Kutxa, como é máis coñecida e se define nos seus estabelecementos, é unha caixa de aforros de ámbito guipuscoano. Kutxa (que significa caixa en éuscaro). É a principal caixa de aforros en Guipúscoa e a segunda de Euskadi en número de clientes. No territorio nacional de Euskadi, só opera en Guipuzkoa. O seu equivalente en Biscaia é a caixa BBK, e en Áraba, a Vital Kutxa.
Desde o 1 de xaneiro de 2012, exerce a súa actividade financeira a través do SIP Kutxabank xunto con BBK e Caja Vital.
Historia
[editar | editar a fonte]As orixes desta entidade remóntanse a 1879 cando se funda na cidade de Donostia, a Caixa de Aforros e Monte da Piedade Municipal de San Sebastián. En 1896 séguea a Caixa de Aforros Provincial de Guipúscoa. En 1990 fusiónanse ambas entidades nunha única caixa de aforros que pasa a ser coñecida polo nome comercial de kutxa.
No 2007 tiña 132 oficinas en Guipúscoa, onde é a principal entidade financeira, e outras 201 oficinas fora deste territorio (195 no resto de España, 5 en Francia e unha no Reino Unido), encontrándose nun período de importante expansión fóra de Guipúscoa; exceptuando Áraba e Biscaia, onde as súas respectivas caixas provinciais actúan como "irmáns financeiros" de Kutxa. Conta con máis de 3.300 empregados.
Resultados
[editar | editar a fonte]Entre setembro do 2005 e setembro do 2006 Kutxa logra 127 millóns de euros de beneficio neto o que represente un incremento do 12,3% respecto ao mesmo período do ano anterior.
Empresas participadas
[editar | editar a fonte]Kutxa posúe participacións en numerosas empresas de todo tipo (fondos de investimento, financeiras, seguros, industria, servizos etc...) Entre as participacións máis significativas cabe dicir que posúe o 11% de Construcciones y Auxiliar de Ferrocarriles (C.A.F.), o 22,98% de Euskaltel, o 9,98% do Banco Guipuzcoano, o 3,01% de Zeltia, o 5% do Grupo Recoletos, o 3% de NH Hoteles, o 17% de Ingelectric, o 41,73% de Ibermática, Saregi Servicios Internet cunha participación do 95%, o 100% de Banco de Madrid...
