Kim Novak
 (2005)  | |
| Biografía | |
|---|---|
| Nacemento | (mul) Marilyn Pauline Novak 13 de febreiro de 1933 (91 anos)Chicago, Estados Unidos de América |
| Residencia | Sams Valley (en)  |
| Educación | School of the Art Institute of Chicago (en) Farragut Career Academy (en) Wilbur Wright College (en) |
| Lateralidade | manicho |
| Cor dos ollos | Abelanado |
| Cor do pelo | Louro |
| Actividade | |
| Ocupación | actriz de cinema, actriz de televisión, modelo, pintora, produtora |
| Período de actividade | 1954 - |
| Familia | |
| Cónxuxe | Richard Johnson (1965–1966) |
| Premios | |
| |
| Descrito pola fonte | Obálky knih,  |
         | |
Marilyn Pauline "Kim" Novak, nada en Chicago o 13 de febreiro de 1933, é unha actriz estadounidense. Considerada un símbolo sexual da época dourada de Hollywood, retirouse da interpretación en 1966, aparecendo a partir de aí só esporadicamente, como nun papel na popular serie de televisión Falcon Crest.[1]
Traxectoria
[editar | editar a fonte]Primeiros anos
[editar | editar a fonte]Novak naceu en Chicago en 1933, filla de Joseph e Blanch (de solteira Kral) Novak, ambos de orixe checa.[2][3][4] O seu pai, que fora profesor, era funcionario municipal de tráfico, e a súa nai era traballadora nunha fábrica.[2][5][6] Foi criada como católica.[7]
Asistiu ao William Penn Elementary, ao Farragut High School,[8] e ao Wright Junior College. Recibiu dúas bolsas para a School of the Art Institute of Chicago,[6][9][10] e durante as vacacións de verán do seu último semestre no junior college, Novak realizou unha xira como modelo dunha compañía de refrixeradores en espectáculos de venda.[11]
Uns anos despois, Novak realizou diversos traballos intentando atopar o seu camiño para o futuro. Traballou como ascensorista, empregada nunha tenda e axudante dun dentista, mais nada lle satisfizo, polo que volveu á profesión de modelo, que ela mesma consideraba que desempeñara ben. Marchou aos Ánxeles para buscar sorte como modelo nesa cidade. Comezou a traballar e un directivo dos estudios RKO ofreceulle un papel moi pequeno nun filme de 1954. A pesar de que o papel era insignificante, un axente fixouse nela e conseguiulle unha proba de cámara nos estudios Columbia, da que resultou un primeiro contrato de seis meses.
Salto á fama
[editar | editar a fonte]Dende o principio da súa carreira, quixo ser orixinal e non outro estereotipo. Por ese motivo, enfrontouse co xefe da Columbia, Harry Cohn, sobre o cambio do seu nome, xa que sendo o seu nome real Marilyn, o estudio decidiu cambialo para evitar comparacións entre Novak e Marilyn Monroe. Cohn suxeriu o nome "Kit Marlowe", discutindo que "ninguén vai ver unha moza cun nome polaco!",[12] mais ela insistiu en conservar o seu nome dicindo "son checa, pero polaco ou checo non importa, é o meu nome!".[13] Os dous acordaron finalmente empregar o nome de "Kim Novak" como compromiso.[14] Tomou unhas clases de interpretación, que o estudio non quixo pagar, e Novak apareceu ese mesmo ano de 1954 no seu primeiro filme, Pushover, con Fred MacMurray. Aínda que a súa actuación non foi digna de mención, os críticos e as audiencias fixáronse no seu atractivo físico e na expresividade dos seus ollos, de xeito que uns meses despois volveu actuar noutro filme, Phffft! (1954), con Jack Lemmon.
Novak comezou a ser popular a raíz destes dous filmes e recibía gran cantidade de escritos de admiradores e admiradoras. Despois do seu seguinte filme, rodado en 1955 e que tamén resultou un éxito, chegou a súa grande oportunidade con Picnic, que protagonizou con William Holden e que foi un éxito rotundo. Novak convertérase nunha actriz e fixo unha interpretación excelente, igual que Holden. Dende entón sucedéronse as súas aparicións como protagonista en filmes coprotagonizados por actores famosos, como Frank Sinatra en Pal Joey e The Man with the Golden Arm ou James Stewart en Vertixe.
Últimos anos no espectáculo
[editar | editar a fonte]Logo de rodar The Amorous Adventures of Moll Flanders en 1965, Novak decidiu retirarse do cinema por un tempo, e volveu tres anos despois con The Legend of Lylah Clare, que foi un fracaso. A pesar diso, puido escoller os seus papeis nos debido á súa enorme popularidade entre o público, que a consideraba unha das actrices máis atractivas do cinema. Non obstante, os filmes en que actuou nos anos seguintes non foron éxitos, polo que se foi orientando cara á televisión, aproveitando as oportunidades que se lle ofrecían neste medio de participar en proxectos de maior calidade ou con maiores perspectivas de audiencia. Por exemplo, actuou na serie Falcon Crest como personaxe fixa durante a sexta temporada no papel de Kit Marlowe, faltando unicamente en media ducia de episodios na parte central da temporada por problemas persoais. Foi idea de Novak nomear a personaxe co nome artístico que Columbia quixera que empregase cando comezou no negocio.[15]
En 1977 rodó con Charles Bronson The White Buffalo, en 1979 Just A Gigolo (con Marlene Dietrich e David Bowie) e en 1980 participou en The Mirror Crack'd, adaptación dun relato de Agatha Christie con outras estrelas como Angela Lansbury, Elizabeth Taylor, Tony Curtis ou Rock Hudson. En 1991 participou no seu último filme para a gran pantalla, Liebestraum, baixo a dirección de Mike Figgis, con quen tivo unha tensa relación durante a rodaxe.[16][17]
Trala súa retirada da interpretación, Novak só fixo aparicións públicas ocasionais, e rexeitou a maioría das ofertas que recibiu.[18]
Vida persoal
[editar | editar a fonte]Novak casou co actor Richard Johnson. O matrimonio durou 13 meses, do 15 de marzo de 1965 ao 23 de abril de 1966. Os dous seguiron a ser amigos despois do divorcio.[6] Na década de 1960, Novak abandonou Hollywood por Big Sur, onde criou cabalos e dedicouse á pintura. En 1974 coñeceu ao seu segundo marido, o veterinario equino Robert Malloy, cando o chamou por mor dunha indisposición dun dos seus cabalos.[19] Casaron o 12 de marzo de 1976, converténdose na madrasta dos dous fillos xa adultos de Malloy.[20]
En 1997, Novak comprou un rancho de 43 acres en Sams Valley, Oregón, que converteron no seu fogar.[21] Novak tomou clases de pintura con pasteis dos artistas Harley Brown e Richard McKinley. En xullo de 2000, o seu fogar ardeu e perdeu todos os seus cadros e o único esbozo da súa autobiografía en que estivera traballando durante dez anos.[21]
Filmografía
[editar | editar a fonte]| Ano | Filme | Personaxe | Notas |
|---|---|---|---|
| 1953 | The French Line | Modelo | |
| 1954 | Pushover | Lona McLane | |
| Phffft! | Janis | Globo de ouro á debutante máis prometedora | |
| 1955 | 5 Against the House | Kay Greylek | |
| Picnic | Marjorie 'Madge' Owens | Globo de ouro á nova estrela do ano Candidata ao premio da BAFTA á mellor actriz estranxeira | |
| The Man with the Golden Arm | Molly | ||
| 1956 | The Eddy Duchin Story | Marjorie Oelrichs Duchin | |
| 1957 | Jeanne Eagels | Jeanne Eagels | |
| Pal Joey | Linda English | ||
| 1958 | Vertixe | Madeleine Elster / Judy Barton | |
| Namoreime dunha bruxa | Gillian 'Gil' Holroyd | ||
| 1959 | Middle of the Night | Betty Preisser | |
| 1960 | Pepe | Cameo | |
| Strangers When We Meet | Margaret 'Maggie' Gault | ||
| 1962 | The Notorious Landlady | Carlyle 'Carly' Hardwicke | |
| Boys' Night Out | Cathy | ||
| 1964 | Of Human Bondage | Mildred Rogers | |
| Bícame, estúpido | Polly | ||
| 1965 | The Amorous Adventures of Moll Flanders | Moll Flanders | |
| 1968 | The Legend of Lylah Clare | Lylah Clare/Elsa Brinkmann/Elsa Campbell | |
| 1969 | The Great Bank Robbery | Lyda Kebanov | |
| 1973 | The Third Girl from the Left | Gloria Joyce | Telefilme |
| Tales That Witness Madness | Auriol Pageant | ||
| 1975 | Satan's Triangle | Eva | Telefilme |
| 1977 | The White Buffalo | Poker Jenny Schermerhorn | |
| 1978 | Schöner Gigolo, armer Gigolo | Helga von Kaiserling | |
| 1980 | The Mirror Crack'd | Lola Brewster | |
| 1983 | Malibu | Billie Farnsworth | Telefilme |
| 1985 | Alfred Hitchcock Presents | Rosa | Capítulo "Man From The South" |
| 1986-1987 | Falcon Crest | Kit Marlowe | 16 capítulos |
| 1987 | Es hat mich sehr gefreut | ||
| 1990 | The Children | Rose Sellars | |
| 1991 | Liebestraum | Lillian Anderson Munnsen |
Notas
[editar | editar a fonte]- ↑ TV Guide, 5 de marzo de 2013: Reclusive Film Legend Kim Novak Opens Up About Life, Regrets and Her TCM Tribute Religado o 20 de xuño de 2014
- ↑ 2,0 2,1 Kleno, Larry (1980). Kim Novak ("On Camera" series). A.S. Barnes. p. 16. Consultado o 23 de febreiro de 2011.
- ↑ Kashner, Sam; Macnair, Jennifer (2003). The bad & the beautiful: Hollywood in the fifties. W.W. Norton & Company. p. 200. Consultado o 23 de febreiro de 2010.
- ↑ Stephen M. Silverman (21 de outubro de 1996). "Animal Magnetism – Personal Success, Kim Novak". People Magazine. Arquivado dende o orixinal o 03 de marzo de 2016. Consultado o 23 de febreiro de 2011.
- ↑ Rosenbaum, Jonathan (2010) [2006]. "Kim Novak as Midwestern Independent" (Goodbye Cinema, Hello Cinephilia). University of Chicago Press. ISBN 9780226726656. Consultado o 11 de xuño de 2016.
- ↑ 6,0 6,1 6,2 Cameron, Sue. "Kim Novak, Elusive Legend". Turner Classic Movies. Arquivado dende o orixinal o 01 de maio de 2014. Consultado o 1 de maio de 2014.
- ↑ Novak, Kim (14 de xuño de 2016). "Kim Novak’s Favorite Things". Wall Street Journal (en inglés). ISSN 0099-9660. Consultado o 27 de maio de 2019.
- ↑ Ebert, Roger (17 de outubro de 1996). "Kim Novak on Hitchcock, Hollywood". RogerEbert.Com. Arquivado dende o orixinal o 22 de xullo de 2012. Consultado o November 5, 2011.
- ↑ :71–74
- ↑ Turnquist, Kristi (31 de xullo de 2010). "Interview with actress Kim Novak, who lives in Oregon and is revisiting her cinematic past". The Oregonian. Consultado o 5 de novembro de 2011.
- ↑ Kim Novak: Live from the TCM Classic Film Festival
- ↑ En inglés, "Nobody's gonna go see a girl with a Polack name!"
- ↑ En inglés, "I'm Czech, but Polish, Czech, no matter, it's my name!"
- ↑ Shales, Tom (14 de outubro de 1996). "Kim Novak: No Fear of Falling". The Washington Post. Consultado o 27 de febreiro de 2014.
- ↑ "Kim Novak name on 'Falcon Crest' has a trivia story". The Free Lance–Star. 16 de xuño de 1987. Consultado o 28 de febreiro de 2014.
- ↑ Forsberg, Myra (19 de agosto de 1990). "FILM; Once Again, Ready on the Set For Kim Novak". The New York Times. Consultado o 22 de febreiro de 2016.
- ↑ Sheehan, Henry (1996). "Kim Novak". Henry Sheehan. Consultado o 22 de febreiro de 2016.
- ↑ Stein, Ruthe (14 de outubro de 2013). "Kim Novak returning to S.F. to share her art". San Francisco Chronicle. Consultado o 1 de marzo de 2014.
- ↑ Whitty, Stephen (2010-08-08). "Kim Novak, the sexy, independent woman everyone in the movies tried to control, is out on DVD". nj.com (en inglés). Consultado o 2 de maio de 2015.
- ↑ CNN, 5 de xaneiro de 2004: Larry King Live: Interview With Kim Novak (transcript) Religado o 20 de xuño de 2014
- ↑ 21,0 21,1 Mail Tribune, July 25, 2000: Kim Novak's home burns Arquivado 13 de agosto de 2017 en Wayback Machine. Religado o 20 de xuño de 2014
Véxase tamén
[editar | editar a fonte] |
Wikimedia Commons ten máis contidos multimedia na categoría: Kim Novak  |
 |
A Galipedia ten un portal sobre: Cine |
Bibliografía
[editar | editar a fonte]- Barnett, Vincent L. (2007). "Dualling for Judy: The concept of the double in the films of Kim Novak". Film History (Indiana University Press) 19 (1): 86–101. ISSN 0892-2160. doi:10.2979/fil.2007.19.1.86.
- I Was In Life: Kim Novak Remembers (photo feature) LIFE
Ligazóns externas
[editar | editar a fonte]- Kim Novak en El Criticón
- Páxina de fans
- Cinefania.com
- Filmografía
- Imaxes en vídeo
- Kim Novak no catálogo do American Film Institute
- Kim Novak Official Artist Website
- Photographs and literature
| Control de autoridades |
|
|---|
