HKm Zvolen

HKm Zvolen
Fundación	1927
Cidade	Zvolen,; Banská Bystrica; Eslovaquia
Estadio	Zvolen Ice Stadium; (5.633 espectadores)
Liga	Extraliga Eslovaca
Campionatos	1
Director	Milan Čanky
Adestrador	Peter Mikula
Cores	Azul, amarelo e vermello;
Na rede
	https://www.hkmzvolen.sk/

O Hokejový klub mesta Zvolen ou HKm Zvolen é un equipo profesional de hóckey sobre xeo da cidade de Zvolen, Eslovaquia. Actualmente compite na Extraliga, a máxima categoría do hóckey sobre xeo eslovaco, competición da cal é o actual campión. Xoga os seus partidos como local no Zvolen Ice Stadium, un pavillón con capacidade para 5.633 espectadores.

Historia

Fundación e primeiros anos

O club foi fundado o 18 de marzo de 1927 como ZTC Zvolen. Non obstante, o seu primeiro partido oficial tivo lugar en 1932, cando se enfrontou ao Slávia Banská Bystrica. O equipo perdeu no seu primeiro partido fronte ao Slávia por 0-18 e por 1-20 o segundo. O Zvolen xogou o seu primeiro partido como local o 14 de febreiro de 1923, perdendo por 0-2 fronte ao Slávia. Na tempada 1933-34 xogou por primeira vez nunha copetición organizada, o Campionato de Stredoslovenská župa. Na tempada seguinte gañou o seu primeiro partido oficial fronte ao Sokol Kremnica. O hóckey sobre xeo foi xogado na cidade de Zvolen mesmo durante a segunda guerra mundial. Logo do conflito bélico, o club tivo uns anos moi exitosos entre 1947 e 1953 que posteriormente se atenuou.

Durante a era checoslovaca

A renovación do hóckey en Zvolen comezou en 1964, establecéndose o club Lokomotíva Bučina Zvolen. En 1970 o equipo ascendeu á 1. SNHL (1. Slovenská národná hokejová), a segunda categoría do hóckey en Checoslovaquia. Na súa primeira tempada na segunda categoría finalizaron na 6ª posición. Na tempada 1971-72 finalizou 3º, e ao ano seguinte proclamouse campión da 1. SNHL, sendo o seu máximo anotador Jozef Golonka. Zvolen clasificouse para a rolda preliminar daExtraliga Checoslovaca, onde perderon 7 dos seus 8 partidos, polo que non conseguiu o ascenso á Extraliga. Zvolen gañou novamente a 1. SNHL na tempada 1974–75, sendo o máximo anotador da liga o dianterio do Zvolen Ján Letko (48 goles). Non obstante, o equipo perdeu novamente na rolda preliminar para ascender á Extraliga fronte ao Ingstav Brno e quedou novamente ás portas de xogar na máxima categoría. Na tempada 1975-76 revalidou o título da 1. SNHL, perdendo outra vez nas series polo ascenso por 3 a 4 fronte ao TJ Gottwaldov. A súa cuarta e derradeira vitoria na 1. SNHL chegou na tempada 1977–78, mais unha vez máis perderon nas series polo ascenso fronte ao TJ Gottwaldov por 2 a 4, polo que Zvolen nunca chegou a debutar na máxima categoría do hóckey sobre xeo checoslovaco.

Era eslovaca

Trala disolución de Checoslovaquia, o Zvolen foi un dos equipos que participou na tempada inaugural da Extraliga Eslovaca, mais descendeu á 1. hokejová liga SR tras finalizar na última posición. O club gañou a segunda categoría na tempada 1996–97 e regresou á Extraliga tres anos despois do seu descenso. Na tempada 1997–98 finalizou na quinta posición na liga regular e caeu nos cuartos de final fronte ao Dukla Trenčín. Na tempada seguinte o equipo chegou ás semifinais tras derrotar ao Trenčín nos cuartos de final, mais caeron fronte ao Slovan Bratislava. O Zvolen xogou a súa primeira final por primeira vez na súa historia na tempada 1999-00, mais caeu fronte ao Slovan por 2 a 3. A tempada máis exitosa da historia do club foi a tempada 2000-01, cando finalizou na primeira posición a liga regular e derrotou por 3-0 ao MHC Mountfield Martin nos cuartos de final, por 3–0 ao HK Poprad nas semifinais, e por 3–1 ao Dukla Trenčín nas finais, proclamándose campión da Extraliga Eslovaca por primeira vez na súa historia. Ján Plch (79 Pts), Richard Šechný (70 Pts) e Petr Vlk (64 Pts) foron os tres líderes da liga regular da Extraliga, mentres que Šechný (19 Pts) foi o líder de anotación nos play-offs.

Dende 2001 o HKm Zvolen foi finalista nas series polo título en catro ocasión mais só puido gañar un título dende ese ano, o da tempada 2012-13.

Continental Cup

Ademais do seu triunfo na Extraliga Eslovaca en 2001, o HKm Zvolen foi campión da IIHF Continental Cup. Na 8ª edición da competición en 2005 chegou á fase final celebrada na cidade de Székesfehérvár (Hungría) fronte ao HC Dynamo Moscova, Alba Volán Székesfehérvár e Milano Vipers. HKm Zvolen gañou os tres partidos e converteuse no terceiro equipo eslovaco en gañar a competición despois de que o conseguiran o HC Košice (1998) e o HC Slovan Bratislava (2004).