Folk rock
![]() | Este artigo precisa de máis fontes ou referencias que aparezan nunha publicación acreditada que poidan verificar o seu contido, como libros ou outras publicacións especializadas no tema. Por favor, axude mellorando este artigo. |
Folk rock | |
---|---|
![]() ![]() ![]() ![]() | |
Orixe musical | música tradicional, rock, pop |
Orixe cultural | anos 60 nos Estados Unidos |
Instrumentos típicos | guitarra eléctrica e acústica, baixo, batería, piano |
Folk rock é unha corrente musical xurdida a mediados da década de 1960 na que se combinaban o folk estadounidense e anglosaxón co entón emerxente pop psicodélico.
Nacemento
[editar | editar a fonte]Esta denominación popularizouse en todo o mundo en 1965, cando a banda californiana The Byrds gravou unha versión da canción "Mr. Tambourine Man" de Bob Dylan. Nela, o grupo anxelino utilizaba os xogos de voces característicos do pop xunto con cristalinas guitarras eléctricas sobre a base da canción de Dylan. Este novo son fixo que o cantautor estadounidense pensase en engadir elementos pop e rock á súa música. Así, cando no festival Folk de Newport no 1965 Bob Dylan utilizou a guitarra eléctrica e unha banda de acompañamento, o público apupouno de forma clamorosa.
Naquela época o folk nos Estados Unidos era un vehículo para expresar a crítica e o descontento coa sociedade estabelecida e moi especialmente coa guerra de Vietnam, proba diso eran as reivindicativas letras dos seus dous máximos expoñentes nese momento: Joan Baez e o propio Bob Dylan. O público folk estaba formado fundamentalmente por activistas de esquerda e universitarios progresistas que consideraban ao rock e o pop coma xéneros superficiais e pouco comprometidos.
Probabelmente estes dous feitos foron os que marcaron o nacemento do folk Rock. A partir deste momento, moitos artistas provenientes tanto do folk coma do pop comezaron tamén a fusionar ambos os estilos converténdose así o folk Rock nunha das principais influencias do Rock psicodélico, podendo considerar a moitos dos seus artistas coma membros de ambas as correntes.