Els Quatre Gats
Els Quatre Gats (en galego: Os catro gatos) é un bar e restaurante situado na planta baixa da Casa Martí (Edificio modernista de 1896 de Josep Puig i Cadafalch), no Barrio Gótico de Barcelona, en España. Destaca por ser, a finais do século XIX e principios do XX, un punto de encontro de artistas do modernismo catalán.
Historia
[editar | editar a fonte]A cervexaría cabaret orixinal abriuse o 14 de xuño de 1897.[1] Durante os seis anos que permaneceu activo, até 1903, foi un dos principais centros do modernismo catalán.
Foi creado e xestionado por Pere Romeu i Borràs, un promotor local do deporte,[2] que fora camareiro no cabaret Le Chat Noir de París. Romeu decidiu crear un ambiente vangardista e bohemio en Barcelona. Os financiadores foron os pintores Ramon Casas, Santiago Rusiñol, Pompeu Gener, Joaquín Mir Trinxet e Miquel Utrillo, o dramaturgo Maties Ardèniz e o banqueiro Manuel Girona.[3] O nome da casa era tanto unha referencia ao bar Le Chat Noir (do francés, "O gato negro") de París, como unha broma sobre o posible escaso número de clientes da nova casa: só catro gatos.[4]
Axiña converteuse nun punto de encontro de artistas e personaxes insólitos, como Rusiñol, Casas, Utrillo, Enric Granados, Isaac Albéniz, Lluís Millet, Antoni Gaudí ou Ricard Opisso, sumándose á tradición de tertulia da cidade. Houbo actos literarios, espectáculos de teatro de sombras e monicreques, actuacións musicais informais de Granados, Malats, Albéniz, Darío de Regoyos, Miquel Llobet etc., lecturas poéticas e sobre todo, exposicións de arte de Regoyos, Isidre Nonell, Ramon Pichot i Gironès, Xavier Gosé i Rovira, Eveli Torent i Marsans e Picasso. As dúas primeiras exposicións individuais que alí tiveron lugar foron en febreiro e xullo de 1900. A exposición de febreiro foi tamén a primeira exposición individual de Picasso.
Durante 1899 publicáronse quince números da revista Quatre Gats.
En xuño de 1903, o establecemento pechou as súas portas por mor das débedas. Sobre todo porque Pere Romeu non era empresario, e permitía que os seus amigos pagasen prezos reducidos, moitas veces nin sequera cobrando nada. Pero o recordo da casa mantívose grazas ao esforzo de Ramón Casas e Miguel Utrillo, que seguiron editando unha revista literaria co nome da casa durante cinco anos máis despois da súa clausura.
De 1903 a 1936, o espazo foi a sede do Círculo Artístico de San Lucas, organización de promoción da actividade cultural e artística de inspiración católica. Curiosamente, unha orientación ideolóxica oposta ao ambiente modernista libertario que antes imperaba en Els Quatre Gats. En 1936, co estalido da guerra civil española, o espazo foi pechado.[5]
A partir dos anos 70, baixo a dirección dos empresarios Pere Moto, Ricard Alsina e Ana Verdaguer, volveu funcionar como bar e restaurante, conservando a decoración, fotografías e gravados da época orixinal. En 1989, a dirección do establecemento pasou a mans de Josep María Ferré. [6]
O filme de Woody Allen Vicky Cristina Barcelona (2008) tivo algunhas escenas rodadas no Els Quatre Gats.
Notas
[editar | editar a fonte]- ↑ LAPLANA, J. C. Santiago Rusiñol: el pintor, l'home. L'Abadia de Montserrat. 1995.
- ↑ Fundación Bancaja (2005). «Els Quatre Gats». Fundación Bancaja.es. Consultado o 26 de setembro de 2015.
- ↑ Enciclopèdia.cat. Dispoñíbel en http://www.enciclopedia.cat/EC-GEC-0053580.xml. Consultado o 10 de setembro de 2017.
- ↑ El Nuevo Diario. Dispoñíbel en http://archivo.elnuevodiario.com.ni/nuevo-amanecer/307269-els-quatre-gats-resultaron-ser-mas-cuatro/ Arquivado 25 de xaneiro de 2022 en Wayback Machine.. Consultado o 10 de setembro de 2017.
- ↑ 4 Gats. Dispoñíbel en http://www.4gats.com/historia/. Consultado o 11 de setembro de 2017.
- ↑ 4 Gats. Dispoñíbel em http://www.4gats.com/es/historia/. Consultado o 10 de setembro de 2017.
Véxase tamén
[editar | editar a fonte] |
Wikimedia Commons ten máis contidos multimedia na categoría: Els Quatre Gats  |
 |
A Galipedia ten un portal sobre: Barcelona |
