Constantin Uhde

Constantin Uhde

(1885)
Biografía
Nacemento	23 de marzo de 1836 Braunschweig, Alemaña
Morte	31 de maio de 1905 (69 anos) Braunschweig, Alemaña
Actividade
Ocupación	arquitecto, profesor universitario
Empregador	Universidade Técnica de Braunschweig

Constantin Ernst Carl James Uhde, tamén escrito Konstantin Uhde, nado o 23 de marzo de 1836 en Braunschweig (Brunswick, Baixa Saxonia, Alemaña) e finado o 31 de maio de 1905 na mesma cidade, foi un profesor universitario do Collegium Carolinum de Braunschweig e arquitecto alemán.

Traxectoria

Foi fillo do astrónomo e matemático August Uhde (Königslutter, 1807—Braunschweig, 1861), profesor do Martino-Katharineum de Braunschweig, e de Caroline Dorothea Pauline Henriette Macrae of Holmains (falecida o 12 de decembro de 1880). Estudou entre 1854 e 1857 no Collegium Carolinum da súa cidade natal. Ingresou a continuación no departamento de construción do Ducado de Braunschweig e na administración do ferrocarril ducal. Alí traballou como enxeñeiro na construción da liña ferroviaria de Altenbeken a Kreiensen.

Entre 1863 e 1865 realizou unha longa viaxe de estudos a Francia, asistindo en París a conferencias de Viollet-le-Duc. Ademais, axudou a Émile Boeswillwald (1815—1896) nos seus proxectos de restauración da Sainte-Chapelle e da Catedral de Orleáns.

Desde 1865 ata 1901 Uhde deu clases no Collegium Carolinum, desde 1871 como profesor da materia de Arquitectura Antiga. Realizou neste tempo numerosas viaxes por Europa, como ás exposicións universais de París de 1867 e Viena de 1873, ou a países como Italia (en 1869, 1872, 1878, 1883 e 1886), Inglaterra (en 1859 e 1887), Escocia e Irlanda (de 1890 a 1891) e á Península Ibérica (de 1888 a 1889). Esta última viaxe tróuxoo a Galicia en maio de 1889. Veu comisionado polo Goberno Imperial alemán para escribir unha obra sobre os monumentos de España e Portugal, e en Santiago de Compostela realizou unha profunda análise da súa catedral, tirando o seu fotógrafo de viaxe, Paul Altmann, unha serie de imaxes da cidade. Ademais, Uhde realizou un feixe de debuxos que, xunto ás fotografías, publicou no seu traballo "Baudenkmaeler in Spanien und Portugal" (Monumentos arquitectónicos de España e Portugal, 1892).

En 1877 foi un dos fundadores da Asociación de Artes e Oficios de Braunschweig, que presidiu entre 1884 e 1903. En 1881 tamén co-fundou a tertulia de artistas locais e amantes da arte chamada Feuchter Pinsel (cepillo mollado), na que participaron o pintor Johannes Leitzen, o escritor e pintor Wilhelm Raabe, o ximnasta e poeta August Hermann ou o acuarelista Hans Herse.

En 1893 foi comisionado polo Imperio Alemán para acudir á Exposición Universal de Chicago de 1893 e, no mesmo ano, foi nomeado Conselleiro Privado imperial. Por fin, en 1898 recibiu o título de Comendador de segunda clase da Orde de Henrique o León polos seus servizos.

Selección de obra arquitectónica

Uhde estivo fortemente influído polo arquitecto Gottfried Semper. A súa obra encóntrase case exclusivamente en Braunschweig, desenvolvido principalmente en estilo neorrenacentista, baseado en modelos do Renacemento italiano e alemán.

Imaxe	Obra	Localización	Ano	Observacións
	Nova Sinagoga e centro comunitario xudeu	Braunschweig Steinstraße, 4	1873–1875	gravemente danado no pogromo de 1938, foi demolido en 1940 argumentando o seu suposto mal estado
	Novo edificio do Collegium Carolinum	Braunschweig Pockelsstraße, 4	1877
	Vila Vieweg	Braunschweig	1879	residencia do editor Heinrich Vieweg
	Vila Westermann	Braunschweig Löwenwall, 6	1880	residencia do editor Friedrich Westermann
	Vila Rimpau	Braunschweig Wolfenbütteler Straße, 2	1881–1882
	Vila Löbbecke en Inselwallpark	Braunschweig Inselwall	1881
	Rehabilitación da fachada da Haus zur Sonne (Casa do Sol)	Braunschweig Kohlmarkt	1885
	Hotel Monopol	Braunschweig Friedrich-Wilhelm-Platz, 4	1889	resultou gravemente danado por un bombardeo en 1945
	Vila Cramer von Clausbruch	Braunschweig Bismarckstraße, 10	1889–1890	foi pazo ducal do mariscal da corte August Cramer von Clausbruch (1854–1927) e, entre 1933 e 2016, o Hospital St. Vinzenz
	Banca Löbbecke	Braunschweig An der Martinikirche, 4	1892–1893
	Sinagoga de Lessingstrasse	Wolfenbüttel Lessingstraße	1893	destruído no pogromo de 1938
	Edificio residencial e comercial	Braunschweig Bohlweg, 39	antes de 1896	destruído na segunda guerra mundial

Obra escrita

Escalinata do Pazo Arcebispal de Alcalá de Henares ("Baudenkmaeler in Spanien und Portugal", 1892)

• "Neubau der Herzoglichen Technischen Hochschule in Braunschweig" (1881, Novo edificio da Universidade Técnica Ducal en Braunschweig)
• "Öffentliche und Privat-Gebäude" (1887, Edificios públicos e privados)
• "Baudenkmaeler in Spanien und Portugal" (1892, Monumentos arquitectónicos en España e Portugal)
• "Baudenkmäler in Großbritannien" (1894, Monumentos arquitectónicos en Gran Bretaña)
• "Die Konstruktionen und die Kunstformen der Architektur: ihre Entstehung und geschichtliche Entwickelung bei den verschiedenen Völkern", en 4 volumes (1902-1911, As construcións e as formas artísticas na arquitectura: a súa orixe e desenvolvemento histórico nos diferentes pobos)
  • volume 1: "Die Konstruktionen und die Kunstformen: ihre geschichtliche, systematische Entwickelung, begründet durch Material und Techniken" (1902, As construcións e as formas artísticas: a súa historia e desenvolvemento sistemático, baseado nos materiais e as técnicas)
  • volume 2: "Der Holzbau: seine künstlerische und geschichtlich-geographische Entwickelung, sowie sein Einfluss auf die Steinarchitektur" (1903, A construción en madeira: o seu desenvolvemento artístico e histórico-xeográfico, e a súa influencia na arquitectura en pedra)
  • volume 3: "Der Steinbau in natürlichem Stein: die geschichtliche Entwickelung der Gesimse in den verschiedenen Baustilen" (1904, A construción en pedra natural: o desenvolvemento histórico das cornixas nos diferentes estilos arquitectónicos)
  • volume 4: "Der Steinbau in künstlichem Stein: die geschichtliche Entwickelung der Gesimse in den verschiedenen Baustilen" (1905, A construción en pedra artificial: o desenvolvemento histórico das cornixas nos diferentes estilos arquitectónicos)

Véxase tamén

Bibliografía

• G. Z. (24-6-1905). "Konstantin Uhde †". Zentralblatt der Bauverwaltung (en alemán) (51). p. 323. 
• Leitzen, Hans (1905). Constantin Uhde. Gedächtnisrede, gehalten im Kunstgewerbemuseum Braunschweig am 23. Oktober 1905 (en alemán). Braunschweig: Limbach. Arquivado dende o orixinal o 08 de decembro de 2015. Consultado o 20 de novembro de 2018. 
• Drüeke, Eberhard (1996). "Uhde, Constantin, Prof.". Braunschweigisches Biographisches Lexikon – 19. und 20. Jahrhundert (en alemán). Horst-Rüdiger Jarck e Günter Scheel (coord.). Hannover: Hahnsche Buchhandlung. p. 616. ISBN 3-7752-5838-8. 
• Paulus, Simon (2011). Deutsche Architektenreisen – zwischen Renaissance und Moderne (en alemán). Petersberg: Imhof-Verlag. pp. 105–108. 
• Krafczyk, Christina (2016). "Constantin Uhde. Bauen in Braunschweig". Quellen und Forschungen zur Braunschweigischen Landesgeschichte (en alemán) 50. Braunschweig: Braunschweigischer Geschichtsverein / Appelhans Verlag. ISBN 978-3-944939-20-9. .

Ligazóns externas

• Obra completa de Constantin Uhde na páxina da Biblioteca da Universidade Técnica de Braunschweig
• Obra de Constantin Uhde na Biblioteca Nacional de Alemaña