Cirrio pálido

O cirrio pálido (Apus pallidus) é un paxaro apodiforme da familia dos apódidos. Como o resto dos cirrios, o cirrio pálido ten unhas patas moi curtas que emprega só para agarrarse en superficies verticais. Pasa a maior parte da súa vida no ar e aliméntase de insectos.

Características

Mide entre 16 e 17 cm e ten unha enorme semellanza co cirrio común. É completamente escuro, excepto por unha gran mancha branca na gorxa, que é frecuentemente visíbel a distancia. Diferénciase do cirrio común na súa corpulencia e por presentar tons de cor marrón.

Distribución e costumes

Os cirrios pálidos crían en penedos e cantís en todo o Mediterráneo, as illas Canarias e no arquipélago de Madeira. Adoitan poñer dous ovos, e ó igual que as andoriñas, son aves migratorias que pasan o inverno no centro de África e o sueste de Asia. Son raros ó norte da súa área de distribución.

Galería de imaxes

• 
  Niño de cirrio pálido.
• 
  Cirrio pálido voando en Tarifa.
• 
  Apus pallidus

Véxase tamén

Ligazóns externas

• Apus pallidus en Iucnredlist.org Arquivado 05 de novembro de 2013 en Wayback Machine. (en inglés)