Manfred Gnädinger

Para outras páxinas con títulos homónimos véxase: Man (homónimos).

Manfred Gnädinger, coñecido como Man ou O alemán de Camelle, nado en Radolfzell o 27 de xaneiro de 1936 e finado en Camelle o 28 de decembro de 2002, foi un pintor e escultor ermitán de nacionalidade alemá que viviu durante corenta anos na praia de Camelle (Camariñas, na costa da Morte). Tratou de levar unha vida o máis sinxela e natural posible, creando unha peculiar paisaxe de pedra preto da praia onde vivía e coidando o seu pequeno xardín.

Manfred Gnädinger

Biografía
Nacemento	27 de xaneiro de 1936 Radolfzell am Bodensee, Alemaña
Morte	28 de decembro de 2002 (66 anos) Camelle, España
Actividade
Ocupación	escultor

Traxectoria

Nace e pasa a súa infancia en Alemaña, procedente dunha familia de sete irmáns, estudou Artes en Italia. Impartiu clases de arte en Suíza a persoas con problemas de integración social. O seu interese pola preservación do medio ambiente e a curiosidade por coñecer a costa galega levárono á Costa da Morte. En maio de 1961 chegou a Camelle, inmerso nas festas patronais do Espírito Santo. Dende ese día ese alemán solitario, educado e de bo aspecto, con certo aire de turista acomodado, instalouse para sempre na vila.

Viviu até á súa morte da axuda dos veciños e do que lle achegaba mostrar a súa arte nas rochas nas que habitaba (un euro por persoa no último ano máis a obriga de deseñar nun caderno o que máis chamase a atención). A súa morte, natural, vinculouse no imaxinario popular coa indignación provocada pola catástrofe do petroleiro Prestige e a marea negra que provocou.

O 9 de novembro de 2010, un temporal levou o que quedaba da súa obra.

Obra

Escultura de Man en Camelle.

En tanto como escultor pódese clasificar nas artes contemporáneas do Land art, e a arte marxinal. Na súa memoria foi creado en Camariñas o Museo do Alemán, actualmente atópase en estado de abandono.

O autor e a súa obra fixeron coñecida no mundo enteiro á vila de Camelle, ata tal punto que é practicamente imposible atopar na rede información deste lugar na que non se faga referencia a Man, e viceversa. A posta en valor e a recuperación do legado de Man, tamén o é, por extensión do porto de Camelle e a súa contorna, nos que Man non só creou, senón que converteu no seu fogar e no seu propio proxecto museístico espontáneo.

O traballo que Man realizou ao longo dos anos nas inmediacións do espigón de Camelle quedou destruído por mor do vandalismo e das últimas catástrofes climatolóxicas da zona. A obra que persiste actualmente no xardín-museo, único xardín mariño de esculturas no mundo, non representa o seu estado orixinal.

En 2014 iniciouse un proxecto denominado MAN: mar, arte e natureza, que ten por obxectivo recuperar a obra de Man e expoñela tanto na Casa do Alemán coma en Internet, por medio dunha exposición virtual.

Véxase tamén

Bibliografía

• Abeleira, Xoán (2006). A pegada de Man. Vigo: Edicións Xerais de Galicia. ISBN 84-9782-464-4. 
• Cequera, Bernardo (2008): Manfred, o alemán de Camelle. Documental 60 minutos

Ligazóns externas

• MAN: mar, arte e natureza
• Entrevista radiofónica a Man en 1986
• Homenaxe a Man. Información sobre a vida e obra de Man.
• Vídeo, con datos biográficos e fotografías de Man.
• Vídeo, datos e imaxes da vida do escultor, crónica dun viaxeiro que o visitou no seu museo.