Indalecio Tizón Covelo
Indalecio Tizón Covelo, nado en Vigo o 9 de xuño de 1921 e finado na mesma cidade o 3 de xuño de 2013,[1] foi un político galego.
| Biografía | |
|---|---|
| Nacemento | 9 de xuño de 1921  Vigo, España |
| Morte | 3 de xuño de 2013 (91 anos) Vigo, España |
| Actividade | |
| Ocupación | político |
| Partido político | Partido Galeguista |
| Familia | |
| Pai | Indalecio Tizón Reboreda |
Traxectoria
editarFillo de Indalecio Tizón Reboreda e María Covelo Raimúndez. Estudou o bacharelato e perito industrial en Vigo. Emigrado na Arxentina durante 16 anos, foi dirixente de institucións galegas e autor da audición Ventana a Galicia en lingua galega. Pertenceu á Rueda Americana de la Amistad e á cooperativa de Autores Marplatenses que lle editou o libro Algunos poemas y otros más. Presidiu a comisión que tratou o problema do emigrante no I Congreso da Emigración Galega celebrado en Buenos Aires en 1956.
Retornou a Galicia en outubro de 1966 e foi candidato a procurador en Cortes polo terzo familiar pola provincia de Pontevedra con Leopoldo García Ortega en 1967,[2] aínda que finalmente retiraron as súas candidaturas ao non admitir a Xunta provincial do Censo os seus folletos de propaganda.[3] Volveu emigrar a Arxentina, significouse na oposición exterior ao franquismo.
Ao seu regreso instalouse en Vigo. Membro da Xunta directiva da Federación Mundial de Sociedades Galegas, presidiu a comisión que organizou o Congreso da emigración galega celebrado en Vigo en xuño de 1976. Ingresou no PSOE e foi Secretario de Relacións Políticas da Federación Galega en 1978. Membro da executiva nacional galega do PSOE, foi candidato ao Senado pola provincia de Pontevedra nas eleccións de 1979.[4] Membro da comisión redactora do Estatuto dos dezaseis, o 9 de xuño de 1979 foi nomeado conselleiro no Segundo Goberno da Preautonomía presidido por Xosé Quiroga Suárez, cargo do que dimitiu o 6 de decembro. Foi candidato á executiva no Congreso extraordinario dos socialistas galegos celebrado en agosto de 1980.[5]
Abandonou o PSOE e integrouse no Partido Galeguista, sendo elixido Vicesecretario no III Congreso celebrado en decembro de 1983. Cando en 1984 o Partido Galeguista decidiu integrarse en Coalición Galega Indalecio Tizón formou parte da súa comisión xestora. En 1986 foi candidato de Coalición Galega ao senado por Pontevedra.
Notas
editar- ↑ INDALECIO TIZÓN COVELO
- ↑ El Pueblo Gallego, 4-10-1967, p. 7.
- ↑ La Noche, 5-10-1967, p. 7.
- ↑ "Pontevedra: Sorpresa en las listas del «PSOE»", La Voz de Galicia, 12-1-1979, p. 17
- ↑ El congreso de los socialistas gallegos reafirmará su oposición al Estatuto
Véxase tamén
editarBibliografía
editar- "Don Indalecio Tizón Covelo. Quiere ser procurador". La Noche: 7. 21-9-1967.