Galimzian Khusainov

Galimzian Salikhovich Khusainov (en tártaro: Галимҗан Салих улы Хөсәенев), nado en Noboe Iglaikino o 27 de xuño de 1937, e finado en Moscova o 5 de febreiro de 2010, foi un futbolista e xogador de bandy soviético, de orixe tártara. Xogaba como dianteiro e foi capitán do Dinamo Kuibyshev e tamén do Spartak de Moscova, club no que militou durante máis dunha década e do que é o terceiro máximo goleador histórico.

Galimzian Khusainov

Biografía
Nacemento	27 de xuño de 1937 Nurlatsky, Rusia (pt)
Morte	5 de febreiro de 2010 (72 anos) Moscova, Rusia
Lugar de sepultura	Danilov Cemetery (en)
Educación	Higher School of Coaches (en)
Altura	1,64 m
Actividade
Ocupación	futbolista, adestrador de fútbol
Período de actividade	1957 - 1973
Partido político	Partido Comunista da Unión Soviética
Nacionalidade deportiva	Unión Soviética
Deporte	fútbol
Posición de xogo	Dianteiro
Traxectoria   Equipo 1957–1960 FC Krilia Sovetov Samara 64 (13) 1961–1973 Spartak Moscova 350 (102)   Selección nacional 1960–1966   Selección de fútbol da Unión Soviética 33 (4)
Participou en
xullo de 1966	Mundial de Fútbol Inglaterra 1966
xuño de 1964	Eurocopa de Fútbol España 1964
1962	Mundial de Fútbol Chile 1962
Premios
Medal of the Order "For Merit to the Fatherland", 2nd class (en)  Mestre emérito do deporte da Unión Soviética

Internacional en 33 ocasións coa selección de fútbol da Unión Soviética, foi subcampión da Eurocopa de 1964, na que marcou un gol na final ante España.

Traxectoria

Como futbolista

Naceu en 1937 en Noboe Iglaikino, no distrito de Nurlatskii, por aquel entón parte da República Autónoma Socialista Soviética Tártara e hoxe dentro da República de Tatarstán. Comezou a súa carreira como futbolista en 1953 en Kuibyshev, no equipo xuvenil do Dinamo, pasando tres anos despois ao Krylya Sovetov da mesma cidade. Alí xogou durante 4 anos, sendo o líder e capitán do equipo.

En 1960 recibiu ofertas de varios clubs, fichando finalmente polo Spartak de Moscova. Capitán dende 1967, gañou co club dúas ligas soviéticas e tres Copas da URSS. Na final da Copa de 1963 marcou un gol olímpico ante o Shakhtar Donetsk.

Selección soviética

Debutou coa selección soviética o 17 de agosto de 1960 nun partido ante a selección da RDA, no que os soviéticos gañaron 1-0. Disputou coa selección os Mundiais de 1962 e 1966, acadando no segundo deles as semifinais.

Marcou o seu primeiro gol internacional na final da Eurocopa de 1964, batendo a Iríbar e igualando o gol inicial de Chus Pereda, aínda que os soviéticos acabaron perdendo o partido tralo gol definitivo do galego Marcelino. Disputou un total de 33 partidos coa URSS e marcou 4 goles.

Trala retirada

Despois de colgar as botas traballou como adestrador asistente en varios equipos, como o propio Spartak Moscova e a selección soviética. Ademais foi membro do Partido Comunista da Unión Soviética.

Morreu a noite do 5 de febreiro de 2010, aos aos 73 anos de idade, despois de padecer unha atrofia cerebral durante máis de 15 anos. Foi soterrado o 9 de febreiro no cemiterio de Danilovskii.

Recoñecementos

Foi elixido Futbolista Soviético do Ano en 1963, mentres que quedou tres veces segundo (1961, 1964, 1965) e catro veces terceiro (1960, 1962, 1968, 1969). Ademais, os seus 142 goles como profesional fixérono entrar no Club Grigorii Fedotov, a lista de xogadores soviéticos/rusos con máis de 100 goles como profesionais.

En 1967 foi condecorado como Mestre de Honra do Deporte da URSS.

Palmarés

Spartak Moscova

• Primeira División da Unión Soviética (2): 1962, 1969.
• Copas da URSS (3): 1963, 1965, 1971.

Panteón de Khusainov no cemiterio de Danilovskii

Véxase tamén

Ligazóns externas

• Datos do xogador no sitio web do Spartak Moscova (en ruso). Arquivado dende o orixinal o 14 de febreiro de 2010.
• Biografía do xogador en utvb.ru (en ruso). Arquivado dende o orixinal o 13 de febreiro de 2010.