Cruz de Santiago

A Cruz de Santiago é unha cruz latina de goles que simula unha espada, cos brazos rematados en flor de lis e unha panela na empuñadura. Dise que a súa forma ten a súa orixe na época das cruzadas, cando os cabaleiros levaban pequenas cruces coa parte inferior afiada para cravalas no chan e realizar as súas devocións diarias..

A Cruz de Santiago

As tres flores de lis representan a honra sen mancha, que fai referencia aos trazos morais do carácter do Apóstolo Santiago.

A espada representa o carácter cabaleiresco do apóstolo Santiago e a súa forma de martirio, xa que foi decapitado cunha espada. Tamén pode simbolizar, en certo sentido, tomar a espada no nome de Cristo.

Orde de Santiago

Artigo principal: Orde de Santiago.

En particular, é o emblema dende o século XIII da Orde de Santiago, chamada así en referencia ao patrón de España, Santiago o Maior. O deseño desta cruz tamén se chama Cruz dos Cabaleiros de Santiago, xa que estes levaban a cruz estampada no estandarte e na súa capa branca. A cruz do estandarte tiña forma de cruz cunha vieira no centro e outra ao final de cada un dos brazos.

Nos escudos heráldicos de diversas poboacións pertencentes anteriormente a esta Orde Militar está representada esta cruz, como é o caso de Sarreaus, Coles, Vilar de Santos ou Laza, na provincia de Ourense, Folgoso do Courel, Palas de Rei ou Paradela, na provincia de Lugo; Boimorto, na provincia da Coruña; Quintanar de la Orden e Cabezamesada, na provincia de Toledo; Villamayor de Santiago, Horcajo de Santiago e Santa María de los Llanos na de Cuenca ou Campo de Criptana e Villanueva de los Infantes en Cidade Real, entre outros moitos casos.

Galería

• 
  Cruz florenzada.
• 
  Cruz apuntada.
• 
  Cruz florenzada apuntada.
• 
  Cruz da Orde de Santiago.
• 
  Cruz de Santiago no atlas heráldico de Jhr. J.L.M.Graafland.
• 
  Cruz recruzada apuntada.
• 
  Cruz de Santiago.
• 
  Escudo de Santiago de Compostela.
• 
  Cruz de Santiago - Orde de Santiago da Espada (Portugal).
• 
  Escudo da carreira diplomática en España.
• 
  Escudo de armas de Caracas.
• 
  Bandeira de Santiago del Estero (Arxentina)

Véxase tamén

Outros artigos

• Orde de Santiago

Ligazóns externas

• A Cruz de Santiago na Xacopedia.