Asemblea Rexional de Murcia

A Asemblea Rexional de Murcia (en castelán: Asamblea Regional de Murcia) é o parlamento autonómico da Rexión de Murcia (España), con sede na cidade de Cartagena. Na actualidade intégrana 45 deputados que representan ás cinco circunscricións en que a Disposición Adicional Primeira do Estatuto de Autonomía divide a Rexión. Os deputados son elixidos democraticamente cada catro anos polos cidadáns da Rexión, aplicándose para a súa elección en cada circunscrición o sistema D'Hondt, pero só si a formación do deputado así elixido conta cun mínimo dun 5% de votos en toda a Rexión.

Parlamento autonómico da Rexión de Murcia, situado en Cartagena.

Entre as funcións da Asemblea está o nomear de entre os seus membros ao presidente autonómico, lexislar sobre aquelas materias que son competencia exclusiva da comunidade e aprobar os Orzamentos Xerais da comunidade autónoma.

Circunscricións electorais

• 1ª circunscrición (7 deputados): municipios de Lorca, Águilas, Puerto Lumbreras, Totana, Alhama de Murcia, Librilla, Aledo e Mazarrón. 232.447 habitantes (2010)
• 2ª circunscrición (10 deputados): municipios de Cartagena, La Unión, Fuente Álamo de Murcia, Torre Pacheco, San Javier, San Pedro del Pinatar e Los Alcázares. 351.911 habitantes (2010).
• 3ª circunscrición (21 deputados): municipios de Abanilla, Abarán, Alcantarilla, Alguazas, Archena, Beniel, Blanca, Ceutí, Cieza, Fortuna, Lorquí, Molina de Segura, Murcia, Ojós, Ricote, Santomera, Las Torres de Cotillas, Ulea e Villanueva del Río Segura. 717.854 habitantes (2010).
• 4ª circunscrición (4 deputados): municipios de Albudeite, Bullas, Calasparra, Campos del Río, Caravaca de la Cruz, Cehegín, Mula, Moratalla e Pliego. 99.107 habitantes (2010)
• 5ª circunscrición (3 deputados): municipios de Jumilla e Yecla. 60.960 habitantes (2010)

A Lei Electoral Murciana resulta sumamente limitadora para os partidos minoritarios ao ser xunto a Asturias unha das dúas comunidades autónomas españolas que estableceron circunscricións electorais inferiores á provincia (co cal resúltalles imposible obter representación en zonas pequenas).

Composición da Asemblea

Tralas eleccións autonómicas de 2011 a Asemblea Rexional de Murcia está composta polos seguintes grupos parlamentarios:

• Grupo Parlamentario Popular: formado por 33 deputados.
• Grupo Parlamentario Socialista: formado por 11 deputados.
• Grupo mixto: formado por un deputado de Esquerda Unida da Rexión de Murcia.

Presidentes

En toda a historia da Asemblea Rexional houbo cinco presidentes distintos, catro deles do Partido Socialista e un do Partido Popular.

Véxase tamén

Outros artigos

• Estatuto de Autonomía da Rexión de Murcia
• Goberno da Rexión de Murcia

Ligazóns externas

• Asemblea Rexional de Murcia Arquivado 20 de xullo de 2011 en Wayback Machine. (en castelán)