Erdenet

	Erdenet; Эрдэнэт
	Sicht op Erdenet
	Bestjoer
Lân	Mongoalje
Provinsje	Orhon
	Sifers
Ynwennertal	86.866 (2008)
Oerflak	208 km²
Befolkingsticht.	/ km²
Hichte	1300 m
	Oar
Stifting	1975
Tiidsône	UTC 8
Koördinaten	49° 01' 40 NB 104° 02' 40 EL

Erdenet (Mongoalsk: Эрдэнэт / ᠡᠷᠳᠡᠨᠡᠲ, letterlik 'mei skatten') is in yndustrystêd yn Mongoalje. It is de twadde stêd fan it lân nei de haadstêd Ulaanbaatar. Erdenet leit likernôch 410 kilometer noardwestlik fan Ulaanbaatar yn de Ajmag Orhon, dêr't it ek de haadstêd fan is.

Erdenet leit oan de foet fan it Burengiin-berchtme. De stêd waard pas yn 1975 stifte, om de wurknimmers fan de nije kopermyn ûnder te bringen. Op kaarten út de tiid fan it kommunisme yn de Sovjet-Uny waard it plak om reden fan har strategysk belang mei opsetsin op in ferkeard plak oanjûn.

Ferkear en ferfier

Erdenet is it einpunt fan in sydtûke fan de Trans-Mongoalyske spoarline, dy't yn Darchan op it haadtrasee oanslút. Twaris deis rydt der in bus nei de haadstêd en werom. De lofthaven fan Erdenet (ZMED/ERT) wurdt net mear brûkt.

Ekonomy

Erdenet hat de op fjouwer nei grutste kopermyn yn de wrâld. De myn is in Mongoalsk-Russyske joint venture. De myn soarget foar it grutste part fan de Mongoalske ynkomsten út eksport en belestingen. Lange tiid waard allinnich kopererts útfierd, mar hjoededei is de mynbou-ûndernimming by steat om sels suver koper te produsearjen. Teffens wurdt der molybdeen wûn.

Fierders sit der yn Erdenet in ynternasjonaal ferneamde tapytfabriek, in fabryk foar libbensmiddels en ferskate houtferwurkjende bedriuwen, dy't hout út de taiga ferwurkje ta timmerhout foar meubels en joerten (Mongoalsk: in ger).