Larnaka

Larnaka (Gryksk: Λάρνακα ; Turksk: Larnaka) is in havenstêd oan 'e súdeastkust fan Syprus. De stêd leit noardeastlik fan Limasol, súdeastlik fan Nikosia en súdwestlik fan Famagusta. Larnaka hat goede ferbiningen mei oare plakken en hat ien fan 'e lofthavens fan it lân.

Larnaka Λάρνακα
Bestjoer
Lân	Syprus
Distrikt	Larnaka
Sifers
Ynwennertal	52.038 (2021)
Oerflak	31,73 km²
Hichte	26 m
Oar
Tiidsône	UTC 2
Simmertiid	UTC 3
Koördinaten	34° 55' N 33° 38' E
Offisjele webside
www.nicosia.org.cy
Kaart

In grut part fan 'e ynwenners binne oarspronklik flechtlingen út Noard-Syprus. Wat grutte oanbelanget, is it plak nei Nikosia en Limasol de tredde grutste stêd fan Syprus. De haven fan Larnaka is de op ien nei grutste haven fan Syprus. Alle jierren bringe miljoenen toeristen in besite oan 'e stêd fanwegen de strannen en it klimaat mei in soad sinneskyn.

Namme

De stêd stie yn 'e âldheid bekend ûnder de nammen Kition en Citium. De namme Kittim dy't yn 'e Bibel neamd wurdt en ferwiist nei it eilân Syprus, soe mei de namme Kition gearhingje. Neffens de leginde stifte Kittim, de pakesizzer fan Noach, de stêd. De lettere namme Larnaka of Larnaks is mooglik ôflaat fan it Grykske wurd larnax, dat sarkofaach betsjut.

Skiednis

Nei alle gedachten waard de stêd yn 'e 13e iuw f.Kr. stifte troch Myseners. It argeologyske Kition leit yn it sintrum fan 'e stêd.

Letter stiften de Fenisiërs in delsetting yn Kition. Dy hie in sterke bân mei Tyrus, dat yn Fenisië lei, it hjoeddeiske Libanon. Letter waard it ûnderdiel fan it Assyryske Ryk.

Yn 'e 7e iuw waard de stêd troch Arabieren dy't Syprus geregeld binnenfoelen ferneatige. De Hala Sultan Tekke, dy't de op twa nei hillichste moskee fan 'e wrâld neamd wurdt, is dêr in oantinken oan.

Wer folle letter oermasteren de Ottomanen it eilân en nei de delgong fan it Ottomaanske Ryk namen de Britten it bestjoer oer. Nei de ûnôfhinklikens fan Syprus bleaunen der noch in pear Britske militêre bases op Syprus oer. Ien dêrfan is de basis fan Dhekelia, dy't yn 'e omkriten fan Larnaka leit.

Foar de Grykske Syprioaten hat Larnaka nei de Turkske besetting fan Noard-Syprus sûnt 1974 in grut part fan 'e havenfunksje fan Famagusta oernommen.

It besjen wurdich

Sint-Lazarustsjerke.

• Yn it noarden fan Larnaka lizze de resten fan 'e antike stêd Kition. De stêd waard yn 'e 13e iuw f.Kr. stifte.
• De Sint-Lazarustsjerke waard boud oer it grêf fan Lazarus.
• De Panagia Faneromenikatakombe leit oan 'e wei nei de sâltmar en is oarspronklik in grêf fan 1200 f.Kr. Letter waard it in kapel en katakombe foar de ferfolge kristenen.
• De Grutte Moskee (Büyük Cami) wie oarspronklik de trijeskippige Hillich Krústsjerke.
• Op it plak fan in midsiuwske kastiel bouden de Turken yn 1625 in fort.
• De Hala Sultan Tekke-moskee is in moskee oan 'e râne fan 'e sâltmar. It is ien fan 'e hillichste plakken foar moslims.
• Oan 'e râne fan Larnaka leit it Kamares Akwadukt (ek Bekir Pasja Akwadukt), dat yn 1745 yn opdracht fan 'e Turkske gûverneur boud waard.

Musea

• Argeologysk Museum fan Larnaka (Kalogrea-plein): grutte kolleksje argeologyske fynsten út it distrikt Lanarka.
• Byzantynsk Museum Sint-Lazarus (Sint-Lazarusplein): kostbere ikoanen, religieuze saken, reliken út de omkriten fan Larnaka.
• Pieridesmuseum (Zenon Kitios 4): it âldste partikuliere museum fan Syprus ûnderbrocht yn in koloniaal hûs fan 'e famylje Pierides. Te sjen binne û.o. read glazuere ierdewurk út de brûnstiid, Romeinsk glêswurk en midsiuwske skalen.

Ofbylden

• 
  Flamingo's yn 'e sâltmar by Lanarka.
• 
  Panagia Faneromeni.
• 
  Hala Sultan Tekke-moskee.
• 
  Kastiel fan Larnaka.
• 
  Kamares Akwadukt.

Boarnen, noaten en referinsjes

Boarnen, noaten en/as referinsjes:

Dit artikel is foar in part in oersettng fan nl:Larnaca. Commons Wikimedia Commons  Ofbylden dy't by dit ûnderwerp hearre, binne te finen yn de kategory Larnaka fan Wikimedia Commons.