Henry Moseley

Henry Gwyn Jeffreys Moseley (Weymouth, ai 23 di Novembar dal 1887 – Galipoli (Turchie), ai 10 di Avost dal 1915) al è stât un fisic britanic.

Al studie a Eton e intal 1906 al jentre tal Trinity College di Oxford dulà che al oten la lauree in fisiche intal 1910. A pene dopo al jentre a fâ part dal grup di ricercje di Ernest Rutherford a Manchester fin al 1913.

Cun sperimentazions intal cjamp de spetroscopie a rais X, propit in chel an al publiche i risultâts des sôs ricercjis dulà che al rive ae conclusion che lis frecuencis dai rais mandâts fûr di ogni element a svariin in proporzion al numar di ordin (atomic) dal element stes (leç di Moseley).

Cu la scuvierte dai isotops si rindisi cont che nol è il pês atomic a incidi su la leç periodiche di Mendeleev ma il numar atomic che al fâs di base pa Taule periodiche dai elements. Cu la Prime Vuere Mondiâl, Moseley, intant lât in Australie, al torne in patrie. Al è ingaiât daurman - cundut che Rutherford al sedi contrari - e al ven copât inte Bataie di Galipoli intal 1915.

No son in pôcs a pensâ che, se Moseley al fos sorevivût ae vuere, al varès vût dal sigûr il Premi Nobel, calcolant la impuartance dal so lavôr fat intal arc di timp di dome 40 mês.