Cjariesâr

un cjariesâr sflorît

• Non furlan:Cjariesâr, o ben cesâr o çariesâr o vuisinâr

• Non sientific:Prunus avium

Il cjariesâr salvadi (Prunus maheleb) tant che il melâr e il perâr al è origjinari des regjons temperadis de l'Asie e de Europe, par po adatâsi ancje al clime e al ambient de Americhe disore.

In Friûl al è presint sedi tal plan che te mont mezane e basse. Par altri tai sîts di mont e tai lûcs pustots al ven su salvadi.

Alte insin a vincjecinc metris, cheste plante e à la scusse rossite che si presente marcade di largjis fassis. Lis fueis ovâls e denteladis a son a pene creis, di un biel colôr ros ramât, par po daspò mudâsi intun vert clâr che di autun al divente purpure.

I ramâts a son voltâts viers l'alt; da pît lis ramulis a puartin çufs di rosis blancjis che tal colm de sfloridure a dan l'impression che l'arbul al sedi cuviert di nêf.

Lis pomis dal cjariesâr a son lis cjariesis (o çariesis) e e àn la scusse dure e, deventant maduris, a passin dal colôr vert al ros e al neri. Inmò la polpe un grum dolce e pôc penze, e siere un grues cuc.

Il len di cjariesâr o ben vuisinâr, brun indorât cun riflès verts, al è ricercjât e doprât par fa mobiliis.