Cjarlins

Cjarlins
Non uficiâl par talian	Carlino
Provincie	Udin
Part	Basse centrâl
Coordenadis gjeografichis	45°48′00″N 13°11′00″E
Superficie	30 km²
Popolazion	2.822 ab.
Densitât	94 ab/km²
Frazions	Cjasâl de Madone, Maranut, Sarvâs
Comuns confinants	Cjasteons di Strade, Maran, Muçane, Sant Zorç di Noiâr
CAP	33050
Prefìs telefonic	0431
Patron	Sant Tomâs Apuestul

Cjarlins al è un comun inte Basse orientâl, che in dì di vuê al fâs part de provincie di Udin e al à 2.822 abitants.

Il Comun al è un centri soredut agricul a contat cu la marine di Maran e al è siôr di trentedoi sîts archeologjics, il plui impuartant al è chel de Cjamane dongje dal flum Ziline.

A son stâts scuvierts reperts soredut de Ete romane, tant che vilis, residencis, tombis, stradis e soredut implants produtîfs di ceramiche di valôr inestimabil.

Tal teritori di Cjarlins a son sîs glesiis: Sant Tomâs Apuestul, Sants Jervâs e Protâs Martars, Sante Marie dal Jutori, Sant Domeni, Sant Antoni e Sant Tomâs Becket.

A Cjarlins al è disponibil ancje un ostel par ospitâ viandants e cjaminadôrs intitulât a Sant Tomâs Becket.

Storie

Tal III mileni prin di Crist si calcolin i prins insediaments preistorics a Cjarlins tal Fortin, a Vilabrune dongje dal flum Ziline e tai Banduçs. Te Ete dal bronç a nassin gnûfs insediaments dongje de boce dal Urian te marine, a Casin, tal Top e daprûf de Roiate.

Te Ete dal fier al fo un grant disvilup dal insediament produtîf tal cjastelîr dal Fortin, dongje de Ziline.

Vie pe Ete romane, tal 131 p.d.C., il pretôr Tito Annio Rufo al tire sù la Vie Annia, che e tacave Aquilee a Concuardie, Altin e Padue e che e passe a tramontane tal teritori di Cjarlins. In graciis de gnove strade, in ete republicane e imperiâl a nassin une vore di insediaments, e ancje une grande fornâs a Cjamane. E ven tirade ancje une strade romane tai Gjai, e o vin i reperts di une necropoli dilunc de S.S. 14.

Tal periodi tardoantîc a son provis de continuitât dai insediaments romans.

Ai 13 di Lui dal 1031, il Patriarcje Popon al done al Cjapitul de Basiliche di Aquilee une vore di vilis, fra chestis ancje la Villam de Carlins; al è il prin document là che si cjate il non di Cjarlins.

Tal 1230 a Cjarlins e rive la jurisdicence e il plait dai siôrs di Cjastiel.

Tal 1284 e tal 1287 i venezians a ocupin par pôc timp Maran che al ven botinât par dôs voltis. La seconde, la citât e ven liberade di Artuic di Cjastiel cun 200 oms che a rivavin massime di Cjarlins. Dopo di chescj fats, il patriarcje Raimont de Tor al vûl protezi il so stât, massime de bande dal mâr e duncje difindi miôr Maran cjapât di smire dai venezians. Alore il patriarcje al permute la Plêf di Maran (cun Sarvâs e Cjarlins) cun chê di S. Margarite dal Gruagn. Di cumò il teritori di Cjarlins nol è plui sot dal Cjapitul di Aquilee, ma te jurisdizion direte dal patriarcje.

Tal 1294 il patriarcje Raimont al da sîs salinis a Raimondin de Tor. Chestis salinis a jerin tes tieris che ancjemò in dì di vuê si clamin Salinis, dongje de bocje dal Urian.

Il prin document là che al salte fûr il non si Sarvâs al è dal 1296, si trate di une invistidure di un ciert teritori parsore di Sarvâs dongje Maran fate a Piçul, Micjêl e Sabidin di Cjasielis, cul oblic di paiâ ogni an pe fieste di S. Martin une marche di denârs di Aquilee e la diesime.

1365 A Cjarlins a jerin lis glesiis di S. Marie, di S. Zuan, di S. Pieri, di S. Jervâs, di S. Tomâs, e une altre di S. Tomâs [Becket] dongje dal mulin di Cjarlins.

Dopo de colade dal Stât Patriarcjâl di Aquilee e des scorsadis dai Turcs tai prins dal Cinccent, lis vueris pe sucession de Contee di Gurize tra Vignesie e la Austrie a cjapin dentri ancje Cjarlins, cun Maran che al ven cjapât dai imperiâi tal 1513 e l'innomenât svuarbament di chei di Muçane tal 1514.

Dopo Pâs di Worms dal 1521 Maran, Cjarlins e Sarvâs a restin tes mans dai Asburcs.

Tal 1543 Vignesie e torne parone di Maran. Sarvâs e Cjarlins e restin in Austrie e di chê volte par simpri dividudis de lôr plêf. Dongje Maran e ven fate sù la piçule fuartece di Maranut par infastidî chê di Maran.

Vie pe Vuere di Gardiscje (1615-1617) tra Vignesie e Imperi, i venezians a sdrumin il fuartin di Maranut, passaç obleât par jentrâ te fuartece di Maran.

Tal 1647 l'imperadôr Ferdinant III al da la contee di Gardiscje (cun Sarvâs e Cjarlins e altris 26 vilis) al princip Zuan Antoni di Eggenberg, duche di Cromau (Český Krumlov). Si costituìs cussì un stât scuasit indipendent ma simpri sot dai Asburcs: la Contee principescje di Gardiscje.

Tal 1717 la famee dai Eggenberg si distude cence erêts e la Contee principescje di Gardiscje, cun Cjarlins e Sarvâs, e torne ae Austrie intune gnove entitât aministrative: la Contee principescje di Gurize e Gardiscje.

Tal 1751, cuant che il patriarcjât di Aquilee al ven sdrumât di plante fûr ancje dal pont di viste religjôs, Cjarlins al passe te Arcidiocesi di Gurize.

Tal 1818 la parochie di Cjarlins, cu lis glesiis filiâls di Sarvâs e di Sant Domeni di Casin (gnove denominazion dal teritori di Maranut) e ven metude sot de Arcidiocesi di Udin, te foranie di Mortean.

Tal 1823 il Comun di Sarvâs al ven agregât al Comun di Cjarlins.

Tal 1830 la parochie di Cjarlins e ven distacade de foranie di Mortean e zontade a chê di Porpêt, come ore presint.

Tal 1866, vie pe vuere tra Austrie e Prussie, il Comun di Cjarlins, cul Friûl za venit, al ven cedût al Ream di Italie.

Tal 1917, vie pe Prime vuere mondiâl, cu la ritirade taliane di Cjaurêt, fin ai 4 di Novembar dal 1918, Cjarlins al è ocupât dal esercit austriac e ongjarês.

Tal 1928 il Comun di Cjarlins al ven agregât, daûr dal orientament dal regjim fassist, al Comun di Sant Zorç di Noiâr. Cjarlins e Sarvâs deventin frazions di Sant Zorç.

Tal 1946, a pene finide la Seconde vuere mondiâl, par volontât de popolazion, al ven tornât a meti sù il Comun di Cjarlins, che al torne in vite al prin di Zenâr dal 1947. Al è a formât des sôs dôs frazions: Cjarlins, cjâf lûc, e Sarvâs che, dal 1974, al à la sô Aministrazion separade dai siei bens di ûs civic.

Gjeografie fisiche

Cjarlins al è un comun dal Friûl-Vignesie Julie, al à su par jù 2700 abitants e al cjape dentri, oltri al cjâf lûc, ancje i borcs di Cjasâl de Madone, Maranut e Sarvâs. Il so teritori al è te part meridionâl de plane furlane e si slungje fin a lenzi la marine; al à une altece sul nivel dal mâr che e va dai 0 m de fasse lagunâr ai 7 m de bande plui a Nord.

Teritori

I aspiets fisics che a segnin il teritori a son zonis coltadis, centris abitâts, boscs di plane, un sisteme fluviâl che a rivin a ôr de marine. Segnât des aghis de Ziline, flum di risultive, il teritori di Cjarlins al pues vantâsi di vê tal so Comun i ultins rescj de antighe “Silva Lupanica”, che par antîc e cuvierzeve dute la Basse. Deforestazions, bonifichis e svegraments a àn puartât chel bosc antîc a esisti intune aree che vuê e tapone cirche 180 etars. La conformazion dal bosc e je dade dal coladiç, dulà che al parone il rôl dongje dal cjarpin blanc, dal olm, dal frassin e dal aiar di cjamp; tal sotbosc a son plantis clamadis “relits glaçârs”, ven a stâi speciis isoladis che a son rescj de ultime glaciazion. Dopo des grandis oparis di bonifiche dal grant bosc di Cjarlins, a son restâts piçui tocs sparniçâts, clamâts Bosc Code di Culune, Bosc di Bolderatis, Bosc di Sacîl, Bosc di Pra Cuaìn (o Pracuaìn), Bosc di Vencjaratis e Bosc dal Bant.

Te fasse litorâl e te part lagunâr o vin temperaduris dolcis par tancj mês e vie pal Istât si podin vê periodis di sut, te Sierade si à il colm de ploie, di Invier lis ploiis a son pocjis e di râr al nevee. In cheste striche de Basse furlane, l’aiar al devente un element fondamentâl, in particolâr la brise che e jude a bonâ la temperadure sedi estive che invernâl, che e je compagnade vie pal an de buere, dal garbin e dal sirocâl. In cumbinazion cu lis escursions di buere scure nol è strani cjatâsi, tai mês invernâi, cu la marine glaçade ancje parcè che chi il fondon al è bas.

I toponims

La prime volte che intun document si cjate il non di Cjarlins, te forme Carlins, al è ai 13 di Lui dal 1031. Al ven scrit intal diplome dal patriarcje Popon che, te consacrazion de basiliche di Aquilee, al da Cjarlins e altris vilis de Basse al Cjapitul di chê catedrâl. Carlins al è un toponim che al ven, come tancj altris, di un non di persone, par solit chel dal paron dal puest là che al è nassût il paîs. Il non di fonde di Cjarlins al è Carli, di divignince gjermaniche. Di Karl al ven il latin Carolus, che al vûl dî “om libar ma cence ereditât”. Karl al tache a pandisi tal VII secul, e si slargje une vore cui Francs, par vie di Carli il grant. Il diminutîf in -ìn cu la zonte dal -s plurâl al podarès volê dî “lûc là che a son a stâ i Carlins”. A Udin, tal borc de Baldassarie, par fâ un paralêl, e je une “Vie dai Carlins.” Di Carlins il non al à mudât in Cjarlins tor dal XII secul, cuant che lis peraulis furlanis che a tachin par ca- e ga- a àn tacât a jessi pronunziadis cja- e gja-. Po dopo, la burocrazie veneziane e taliane a àn doprât une forme uficiâl Carlins, gjavant vie la pronunzie sclete furlane in Cja- (scrite par antîc Chia-) fin ae ultime version Carlino.

Sarvâs. Il non di Sarvâs al ven dal latin Sanctus Gervasium. Si lu cjate pe prime volte intun document dai 23 di Novembar dal 1296. E je une invistidure tal Thesaurus de Glesie di Aquilee. I sants zimui Jervâs e Protâs a son i titulârs de glesie di Sarvâs, filiâl di chê di Cjarlins. La vile, par vê cjapât sù il non dal sant, e à di jessi nassude dongje de glesie. Si pues ipotizâ che la prime intitulazion di une antighe gleseute dongje dal vât de Roiate e sedi stade fate dopo dal 835, cuant che il vescul di Milan Enghelbert al cjatà pe seconde volte i cuarps dai doi fradis martars (la prime volte ju veve cjatâts S. Ambrôs tal 386), e si slargjâ une vore la lôr devozion.

Maranut. La situazion politiche de prime metât dal secul XVI e je une vore intrigade. Cjarlins e il so teritori a son arciducâi e duncje dal Imperi. Maran, sot di Vignesie za dal 1420, tal 1513 al ven cjapât dai imperiâi. Tal 1542 al torne venezian, cul confin imperiâl a 500 pas de fuartece. Scuasi dongje dal confin, l’Imperadôr Ferdinant I al fâs tirâ sù un fuartin ator de glesie di Sante Marie dal Arbul, filiâl di chê di Cjarlins, par tignî sot scac Maran e fâ paiâ il dazi ai venezians te uniche strade di tiere che e furnive la fuartece. Che lûc al fo in prin clamât in mût enfatic “Maran novo” e po dopo, par vie che al jere piçul, Maranut.

Glesiis

La glesie parochiâl di Cjarlins e je dedicade a Sant Tomâs Apuestul. Fate sù intal 1735 e consacrade intal 1772, e à cjapât il puest di edificis sacris plui antîcs. E à un implant neoclassic, cun decorazions par dentri de seconde metât dal Votcent. La façade, datade 1852, e je spartide in trê di cuatri lesenis cun capitei jonics poiadis suntune base di piere, e e je sormontade di un templâr triangolâr. A son trê nicjis cu lis statuis di Moisès, Sant Tomâs Apuestul Sant Roc. Su la jentrade al è un templâr triangolâr poiât su doi plans.

La glesie e je siore di palis di altâr dal secul XIX, e un grant cicli di pituris a fresc di Domenico Fabris (1814 – 1901). Intes parêts dal côr trê grandis pituris a fresc cun senis de vite di Marie.

La orchestre e casson dal orghin (1893) a son di Girolamo Raddi daûr dal progjet di Vincenzo Rinaldo. L'orghin al è dal 1902, fat di Beniamino Zanin di Cjamin di Codroip.

La glesie di cjamp di Sant Tomâs Becket e Santuari de Beade Vergjine de Salût

Al è un edifici di cult cristian fûr dal centri abitât. La glesie di vuê e je stade fate sù tra la fin dal Sîscent e i prins dal Sietcent, parsore di un edifici une vore plui antîc, che dal sigûr al esisteve za tal 1365. Te Ete di Mieç e jere za dedicade al sant arcivescul inglês copât inte sô catedrâl intal 1170.

L’edifici nol è tant grant (19x7m), ma ben proporzionât. La façade e presente un templâr triangolâr fat di suazis che a vegnin infûr e tignût sù di dôs lesenis sui cjantons. La puarte e je formade di antîi e un soiâr disore di piere. Parsore de puarte, intal mieç de façade, al è stât cjatât un barcon curvât inmurât là che dentri al jere un mosaic a forme di lunete (datât 1991) di scuele spilimberghese che al figure la Beade Vergjine de Salût.

Dacîs de glesie al è il piçul tor moderni, tirât sù daûr dal progjet dal architet Andrea Bragutti. Parsore de struture gjeodetiche, fate sù cun tubolârs e cuardis di açâl, e je la piçule “Cjampane de pâs” che dutis lis seris e memoree cui siei glons i muarts di dutis lis vueris. Il didentri al à une navade sole, cuntune suaze che e cor ator ator dai mûrs. Il cuviert al à cjavai e trâfs in len a viste, che a tegnin sù planelis pituradis a losanghis blancjis e rossis. Un arc di trionf poiât su dôs colonis al vierç la navade bande dal presbiteri, a plante poligonâl, cun sofit centenât a vele. Une crôs pes processions in len piturât e je picjade parsore de jentrade.

L’altâr fat sù intal 1733 di Zuan Batist Cucchiaro al è siôr di marmui esotics, tant che l’african, e su la mense al à une nicje dulà che e je la statue de Beade Vergjine de Salût; plui adalt, tra i nûi di marmul dal cimîr, si à la pale piçule e antighe di Sant Tomâs vescul. In bande a son dôs statuis di marmul che a figurin Sant Tomâs vescul a man çampe e Sant Valantin predi a man drete.

Zornadis di cult: ai 29 di Dicembar Sant Tomâs Becket, ai 9 di Avost avôt civic pal colere dal 1855, ai 21 di Novembar Beade Vergjine de Salût, avôt dal 1836 (che ogni trê agns e devente, la prime domenie di Setembar, fieste trienâl).

Glesie di Sante Marie Ausiliadore

Judicade aromai no plui suficiente la antighe glesie dai Sants Jervâs e Protâs, intal 1962 a son tacâts i lavôrs par fâ sù la gnove glesie de Sarvâs daûr dal progjet dal architet Luciano Ria. Dopo cinc agns di lavôr, la glesie e je stade finide. Domenie ai 15 di Otubar dal 1967 l'arcivescul Zaffonato le à screade cresemant 21 di lôr.

La gnove glesie di Sarvâs, dedicade a Marie Ausiliadore, e je la uniche in stîl contemporani tra chês dal comun di Cjarlins. Pensade e progjetade pôc prime de riforme liturgjiche nassude dal Concili Vatican II, e mostre un implant che al è ancjemò chel des glesiis dopo dal Concili di Trent. E veve dome un altâr cul tabernacul intal mieç, in scuare cu la glesie, cu la mense par dî messe poiade cuintri dal abside. Plui tart si zonte un altri altâr “versus populum” par dî messe. Dut câs il stîl al segne un tai clâr cu lis costruzions sacris de prime metât dal Nûfcent. Nuie neogotic, neoromanic o neorinassimentâl par lâ daûr dai stîi antîcs cun adataments e ecletisims, ma in fin un stîl gnûf, che si pues calcolâlu moderni e razionalist, che al dinee decorazions e i bilisiis par pontâ di plui su la relazion jenfri volums e formis.

La glesie dal architet Ria e à cussì une schirie di modui leâts al esagon e al mieç esagon, cemût che si pues viodi intai spazis là che a son il batisteri e la statue de Madone, o inte forme dai barcons, des puartis e dai confessionâi. Cun di plui, parsore de jentrade, doi modui esagonâi, che a vegnin infûr rispiet al edifici e a tegnin sù la cjampane, a riclamin tancj tors in façade tipics de Basse furlane tant che chel de antighe glesie di Sarvâs.

La statue de Madone Ausiliadore (dal 1942) di Vincenzo Mussner di Ortisei e je un dai ogjets sacris plui amâts de popolazion che, dal 1946 incà, le puarte in procession intant de Fieste dal Perdon la ultime domenie di Setembar.

Istruzion

Lis struturis scolastichis dal teritori comunâl a son:

• la Scuele paritarie pe infanzie “Don Riccardo Valentinis”
• la Scuele primarie “G. Carducci”
• la Scuele secondarie di prin grât “G. Carducci”

Al è atîf un servizi di Bus pe scuele pal traspuart dai arlêfs. Cun di plui, il Comun al organize un servizi di preacet e un di doposcuele. Te scuele primarie e je ative une mense.

Di cualchi an, il Comun al premie cuntune borse di studi i miôr students che a finissin lis scuelis secondariis.

Sport

Lis carateristichis dal ambient naturâl (marine, flum Ziline, bosc), a àn prudelât il disvilup di ativitâts sportivis peadis al teritori, tant che la pescje, la nautiche o la cjace. Di cualchi an, ancje in gracie dai progjets di valorizazion di chescj lûcs e di une riscuvierte dal turisim “lent”, e je simpri plui int che e cjape gust a spassizâ pai trois di campagne, a piduline o in biciclete, massime lant daûr des indicazions de Vie dai Boscs (la “Boscovia”) de Basse Furlane, un percors che si disvilupe dentri di chê che un timp e jere la Silva lupanica.

Altris associazions a son nassudis par insegnâ, in plui dal balon, danze, judo, tenis e ancje patinaç artistic.

Intal comun a son doi cjamps di tenis, une palestre, doi polisportîfs e il stadi comunâl “Eros della Ricca”.

La scuadre di balon dal puest e je il “Cjarlins Muzane”, che e zuie in Serie D, cun risultâts une vore bogns ancje te classifiche.

A Cjarlins e je nassude Mara Navarria, zuiadore di scherme e vincidore de Cope dal mont ai mondiâi di spade di Wuxi (Cine) tal 2019.

Servizi bibliotecari

E je ative une biblioteche comunâl tal Centri Civic in vie Maran, 1 cun plui o mancul 18.000 libris a disposizion dai utents, cuntun catalic siôr di oparis in lenghe furlane e inglese.

Inte sede bibliotecarie si inmanein dispès leturis pai fruts, teatri pai zovins, mostris fotografichis e artistichis e ogni vot di Dicembar une mostre marcjât dai libris, là che si impie il grant arbul di Nadâl: un cedri dal Liban alt 25 metris.

La biblioteche e je stade fondade intal 1979 in graciis dal lavôr di Meris Zanutta, la prime assessore femine inte storie dal Comun.

In dì di vuê la biblioteche e fâs part dal sisteme bibliotecari dal Friûl "InBiblio Fvg".