Hinrich C. Hinrichsen

Tekst üüb Öömrang

Hinrich C. Hinrichsen (*29. April 1898 uun Dunsem üüb Fer, † 1978) wiar en skuulmääster an hää ham för't fering-öömrang spriak an literatüür iinsaat.

Leewent

Hinrich, hi wurd leeder uk "Hinne Ruul" näämd, wiar det äälst kint faan Roluf D. Hinrichsen an sin wüf Elene, bäären Braren. 1920 maaget hi sin iarst skuulmäästerpreew an werket iarst uun Ööwenem, leeder uun Medelby. 1924 wiar hi befreid mä Karoline, bäären Hinrichsen, hed ian doochter an füng en fääst steed bi't skuul uun Olersem. Diar begand hi an skrääw an saameld jongensliitjin an riimen, diar uun a "Föhrer Lokalanzeiger" ufdrükt wurd. 1929 wakselt Hinrich auer tu Ödersem an 1932 kaam sin letj heft "Allerhand ual Stacken an Riemen..." ütj. 1938 ging'er tu Foortuft, huar hi oober ei loong werket hää, auer hi 1939 uun a kriich skul. Diar kaam'er iarst 1949 weder tüs faan an füng do en steed uun Noorsaarep. Üüb Oomram begand "Hinne Ruul" weder mä't skriiwen an jääw det heft "Oome, fertel mi wat" ütj. 1954 ging'er weder tu Foortuft an skrääw det teooterstak "At rocht hialmedel". Uk üs hi 1963 uun panjuun ging, skrääw hi noch flook staken. 1978 stoorew hi uun't tachentagst juar.

Bibliografii

• Für uns! - Sonderbeilage zum "Föhrer Lokal-Anzeiger" Nr. 103, 1925
• Allerhand ual Stacken an Riemen an noch wat, diar Jongen hall auerwees mei. o. J. (1932), Wyk üb Fehr, 32 S.
• Oome, fertel mi wat!, 1953, Noortharep, 12S.
• Et rocht Hialmedel, Kameedestak üüb fereng uun fjauer Aptöög, amanbi 1955, ei drükt
• flook letjer staken, ei drükt