Estaus Uníus

Estaus Uníus

Luenga oficial	Ingrés
Capital	Washington D.C.
Presidenti	Joe Biden
cumprimentu  - Total  -2,198% % augua	Posición 3ª 9.631.418 km² 1,34%
Puebración  - Total (2016)  - Densiá	Puestu 3º 324.099.593 31 ab/km²
PIB  - Total (2005)  - PIB/capita	Posición 1ª 13.790.000 millonis e US$
Moeda	Dólar estauniensi
Inu	The Star-Spangled Banner
Dominiu d'Internet	.us
Códigu telefánicu	1
Biembru de: ONU, OTAN, OEA, APEC, OCDE, OSCE, TLCAN, G-8, G-20

Los Estaus Uníus d'América es un país assitiau en América el Norti, enque Hawaii, unu los sus estaus, s'alcuentra en Oceanía. Está holmau por cincuenta estaus, un destritu federal (Washington D.C., qu'es la capital) i angunus algotrus territórius. Es una repúbrica presiencialista i federal.

Goviernu i politica

Estaus Uníus es una repúbrica costitucional, presiencial i federal. El su goviernu tien unos pueris limitaus numiraus ena Costitución. La su holma de goviernu es cantá comu democrácia presiencialista polque ái un presienti. La eleción del presienti es endireta pol compromisarius u grandis eletoris. Dendi 2021, Joe Biden es presienti del país.

Geografia

La geografia el área continental es acientá ena zona ociental, ondi están assitias las Montañas Rocosas. Ena zona noresti s'assitian los Montis Apalachis i ena región suloesti esmiença la Sierra Mairi mejicana. Al norti, los estaus continentalis s'arrejuntan con Canadá, i Alaska, con el Oceanu Gracial Álticu; al Sul hazin arrayu con Méjicu i el Golfu de Méjicu; al esti s'alcuentra el Océanu Alánticu, i al oesti, el Océanu Pacíficu.

Estoria

Enantis de la llegá de los uropeus abitaban nel territoriu albondu puebrus endígenas, angunus llegandu a crial colturas avançás, comu la Misisipiana. Los primerus assitiamientus uropeus s'estabrecierun a partil del sigru XVI huendu españolis, francesis, británicus i olandesis. Los Paisis Baxus cedierun las sus colonias a los británicus, que poquinu a poquinu van a holmal las 13 colónias, que se conviltirian enos Estaus Uníus d'América al atrás duna guerra pola endépendencia, causá polas tensionis entri la metrópoli i los colonus (1775-1781). El nuevu estau recogi ideas ilustrás, comu la igualdá entri tolos ombris, los derechus umanus, etc. George Washington hue el primel presienti de la nacion.

Endespues de la endependencia, el goviernu estau-uniensi siguió una política d'espansion acia el esti, lo que le llevó a una serii de runchas. La devision enterna entri partidaruis de la esclavitú i los que non lo eran provocó la Guerra Cevil Estau-uniensi (1860-1865), nel que los estaus del sul (partidarius de la esclavitú ya qu'era mu emportanti ena su economia) se proclamarun endependientis. La guerra acabijó cona vitória de los abolicionistas.

Duranti tol sigru XIX los Estaus Uníus esperimentarun una revolucion endustrial, conviltiendu-se nuna potencia económica i política. Al escomençal la I Guerra Mundial se va a declaral neutral peru acabijó entrandu apoyandu a los aliaus. Los años 20 huerun duna gran prosperiá económica que acabijó ena Gran Depresion de 1929.

Duranti la II Guerra Mundial, los Estau Uníus tuvun un emportanti papel, runchandu sobri tó a la escontra d'Alemaña i Japón, llegandu a gastal dos bombas atómicas nessi país, destruyendu las ciais de Hirosima i Nagasaki. Endespues desti conflitu el mundu se deviió en dos bloquis, el comunista (representau pola Union Soviética) i el capitalista cuyu mássimu representanti eran los Estaus Uníus (la conocia comu Guerra Fria). Cona caía de la Unión Soviética acabijó la Guerra Fria.

Ogañu esti país sigui huendu una poténcia mundial, enterviniendu en numirosus conflitus nel mundu. En 1991 encabeçó la ofensiva aliá ena Guerra del Golfu, en 2001 envadió Afganistán comu respuesta al atentau terrotorista a la escontra las Torris Gemelas de Nueva York, i en 2003 envadió Iraq derrocandu a Saddam Hussein.

Atijus p'ahuera

• En Commons ai conteníu multimedia sobre Estaus Uníus.