François Augiéras

François Augiéras
Bizitza
Jaiotza	Rochester, 1925eko uztailaren 18a
Herrialdea	Frantzia
Heriotza	Périgueux, 1971ko abenduaren 13a (46 urte)
Familia
Aita	Pierre Augiéras
Hezkuntza
Heziketa	Collège Stanislas de Paris (en)
Hizkuntzak	frantsesa
Jarduerak
Jarduerak	idazlea eta eleberrigilea
Izengoitia(k)	Abdallah Chaamba

François Augiéras (Rochester, 1925eko uztailaren 18a - Périgueux, 1971ko abenduaren 13a) frantses idazle eta margolaria zen.

Bizitza

Aita pianista frantsesa zen, ama etxekoandre poloniarra. 1933an, aitaren heriotzak bultzatuta, ama Frantziara itzuli zen, Perigueux herrira.

Augiéras, bere bizitzako azken urteak jaioterriko leize batean eman bazituen ere, Algerian, Malin, Mauritanian eta Grezian bizi izan zen. Greziako Athos mendian fraide gisa emandako denboraldia ez ezik —kanporatua izan zen— Afrika ere izan zen bere bizitzaren eta lanaren paisaia.

Lanbide ugari izan zituen Afrikan. Artzain eta ehiztari ibili zen tarteka, baina bere zeregin nagusia idaztea, margotzea eta gorputzaz gozatzea izan zen. Haren idatziek garbi erakusten digute bere bazterrekotasunaz kontziente zela. Putetxe batetik irtetean jasotako jipoia, eraikuntzako langileekin izandako sexu-harreman debekatuak... Augiérasen Le voyage des morts liburu eder eta basatian desertuko hautsaren poetika eta sifilia sendatzeko erabiltzen zuen penizilinaren zaporea nahasten dira.

Margolaritza eta eragina

Augiéras margolaria ere bazen. 1950eko hamarkadan, Afrikako eremu ezezagun batean, Bigarren Mundu Gerrako alemaniar bunker baten barruko aldea guztiz margotu zuen. Hamarkada bat geroago itzuli zenean, keaz ilunduta eta pintadaz gainezka topatu zuen. Berriro margotu zuen bunkerra, guztiz itxi, eta hondarraz estali eta ezkutatu zuen.

Augiérasen miresle den Miquel Barceló artista eta Isaki Lakuesta zinegilea bunker ezkutuaren bila abiatu ziren. Barceló, Augiérasen alter egoaren moduko bat bihurtuta, margolan ezkutuaren bilaketa-bidaiari ekin zion. Emaitzarekin Los pasos dobles izenburuko filma osatu zuten.

Lanak

Le Vieillard et l'Enfant, 1954
Zirara, 1957.
Le Voyage des morts, 1959
Une adolescence au temps du Maréchal et de multiples aventures, 1968
Un voyage au Mont Athos, 1970
L'Apprenti sorcier, 1976 (hil ostean)
Domme ou l'Essai d'occupation, 1982 (hil ostean)
Les Barbares d'Occident, 1990 (hil ostean)
Lettres à Paul Placet, 2000 (hil ostean)
Le Diable ermite, 2002 (hil ostean)
La Chasse fantastique, 2005 (hil ostean)

Kanpo loturak

François Augiéras elkartea

Datuak: Q1108068