La seconda guerra civile americana
C'l artìcul chè 'l è scrit in
Miranduléś |
![]() | ||
La seconda guerra civile americana | ||
![]() L'Elizabeth Peña in na figùra dal film | ||
La secónda guèra sivìla americàna 1997 | ||
---|---|---|
Regìa: Joe Dante | ||
Scritōr: Martyn Burke | ||
Atōr: Beau Bridges • Phil Hartman • Dick Miller Elizabeth Peña • Joanna Cassidy • Ron Perlman James Earl Jones • James Coburn • Denis Leary | ||
Müsica: Hummie Mann | ||
Léngua: Ingléś • Spagnōl | ||
Dürä dal film: 97 minüt | ||
Nasiōṅ: Stat Unî |
La seconda guerra civile americana (La secónda guèra sivìla americàna) l'è na cumèdia par la televiśiòṅ dal 1997 ad Joe Dante. La cònta na stòria imaginària ambintàda in di Stat Unî dal futûr in du a taca na guèra sivìla dòp qvéla 'd secesiòṅ dal XIX sécul.
Par cla pelìcula chè Beau Bridges 'l à vins un Prèmi Emmy par la sò part dal guvernadōr d'l Idaho.
Sunt
In di Stat Unî in di ùlt'm an a gh'è stâ dimóndi cambiamènt in dla pupulasiòṅ in du i èṅ carsû dimóndi i furastēr tant ch'al sìndig ad Los Angeles al dascór sōl in spagnōl, un senadōr d'l Alabàma 'l è 'n indiàṅ e al Rhode Island 'l è praticamènt na culògna cinéśa.
Par muciàr sù di vōt, al presidènt americàṅ (Phil Hartman), ch'l è sòlit far-as scrìv'r i sò dascōrs a la manéra 'd Dwight D. Eisenhower, 'l à decìś ad far rivàr da 'l Pàkistan, in guèra cun l'Ìndia, soquànt baghēt òrfan da uspitàr pò in dal stat d'l Idaho. Al sò guvernadōr Jim Farley (Beau Bridges) al s mét però ad travèrs firmànd na léǵ par srar i sò cunfîṅ intèran, un quèl che, par la custitusiòṅ, al n prév minga far.
Al canàł televiśìṿ NN dal diretōr Mel (Dan Hedaya) al s buta a pés su la nutìsia mandànd la sò giurnalìsta Christina (Elizabeth Peña) a dascórar c'n al guvernadōr ch'l è inamurâ 'd lē anc se nada in Mèsic. In cal mént'r al presidènt, anc su cunsìli dal sò culaburadōr Jack B. Buchan (James Coburn), al decìd ad dar 'n ultimâ ad ssanta-sèt óri e mèś a Farley par vèr'r i cunfîṅ, pò al manda 'l eśèrcit in dal nòrd dal Utah.