Félix Mantilla
|
C'l artìcul chè 'l è scrit in
Miranduléś |
Félix Mantilla Botella (Barcelóna, 23 ad Setémbar dal 1974) 'l è stâ 'n tenìsta spagnōl. Al gh'à dâ a muć in dal 2007 dòp ès'r-as mis in bisàca da piò ad sinc migliòṅ ad dòlar.
'L 8 ad Śugn dal 1998 'l è rivâ a ès'r al nùmar déś dal mónd in singulàr. 'L è élt un mét'r e utànta e al pésa stant'òt chilo. Al dróa 'l bras sinìst'r e al tira 'l arvèrs cun na maṅ sōla.
'L è stâ vinsìdōr ad déś tìtui ATP tut su la tèra batùda, al sò camp preferî, in dua 'l è anc stâ bòṅ ad rivàr in semifinàl a 'l Roland Garros in dal 1988 baténd Thomas Muster e pardénd in quàtar sét da Carlos Moyá.
Al sò sucès più grand in caréra 'l è stâ vìns'r al turnèo 'd Róma in dal Maǵ dal 2003 baténd Roger Federer par 7-5 6-2 7-6. In Itàglia al s è mis in bisàca anc i tìtui ad Bulógna dal 1997 (4-6 6-2 6-1 a Gustavo Kuerten) e ad Palèrum dal 2001 (7-6 6-4 a David Nalbandian). Fra gl'àtar riśultâ da 'rcuràr a gh'è anc un quàrt a gl'Australian Open in dal 1997 (5-7 2-6 7-6 2-6 da Carlos Moyá), al tìtul ad Barcelóna dal 1999 (7-6 6-3 6-3 a 'l maruchèṅ Karim Alami) e qvél 'd Umâg dal 1997 (6-3 7-5 a Sergi Bruguera).
Dòp al turnèo di US Open dal 2005 Mantilla al s è farmâ p'r un pôc par tiràr-as sù fiśicamènt ma specialmènt par curàr-as da 'n cànc'r a la pèl. In dal 2007, dòp èsar śliciâ śò sóta la puśisiòṅ duśènt dal mónd, 'l à pruâ a turnàr a śugàr in di Challenger ad Mónśa (secónd tùran) e ad Réś in dua 'l è rivâ anc in finàl ma al l'à pò pardùda.