Deee-Lite

C'l artìcul chè 'l è scrit in Miranduléś

«

What is it that can make a lost soul found? Love. And what is it that can make the coldest day seem warm? Love. And what is it that can bring a smile through to a stranger? I believe in the power of love.»

(EN)(Power Of Love, 1990)

«

Cuś è'l ch'al pōl far catàr n'anma pardùda? 'L amōr. E cuś è'l ch'al pōl far dvintàr al dè più fréd cald? 'L amōr. E cuś è'l ch'al pōl purtàr-at un surìś par mèrit 'd un furastēr? Mè a créd in dal putēr d'l amōr.»

(MUD)

I Deee-Lite i èṅ un grup muśicàl americàṅ ad New York cgnusû in d'l àmbit dl'house music e dla dance, speciàlment p'r al sìngul dal 1990 Groove Is in the Heart, òṅ di sò siē braṅ ch'i gh l'àṅ cavàda a rivàr a 'l prim pòst dla Billboard Hot Dance Club Play.

I Deee-Lite, ch'i aṅ ciapâ sù al nóm da la canta It's Delovely ad Cole Porter, i èṅ:

Super DJ Dmitri (Dmitry Brill, nâ al 4 ad Śugn dal 1964 a Kiev, Ucraìna), prudutōr
Lady Miss Kier (Kierin M. Kirby, nada al 15 'd Agóst dal 1963 a Youngstown, Ohio, Stat Unî), vóś
Towa Tei (Dong-hwa Chung, nâ al 7 ad Setémbar dal 1964 a Tokyo, Giapòṅ), tastéri
DJ Ani (Ani Q. Schempf, nâ al 14 ad Dicémbar dal 1973 a Kànsas City, Kànsas, Stat Unî), mix

Biugrafìa

Al prim disc dal grup, purtâ in élt da i sìngui Groove Is in the Heart, Power of Love, What Is Love? e Good Beat, tut nùmar òṅ a cavàl di an 1990 e 1991, 'l è World Clique ch'al gh la cava a rivàr a 'l 14śum pòst in dal clasìfichi dal Régn Unî e a 'l 20śum pòst ad qvéli americàni. Dū an dòp 'l è al tùran 'd Infinity Within, un disc ch'al vénd ad méno ma ch'a s difénd bèṅ listés cun al prim sìngul Runaway incóra nùmar òṅ in dal clasìfichi dance ad Billboard.

In cal méntar la Kirby e Dmitry, ch'i éran murōś in alóra, i s mòlan e chi lò al lasa al grup prima ch'a gnis fóra al tèrs àlbum dal 1994 Dewdrops in the Garden. Al fà sōl in tèmp a dar al sò cuntribùt a 'l sìngul Call Me, nùmar òṅ cuma Bring Me Your Love. A tōś al sò pòst al DJ Ani.

Praticamènt la stòria di Deee-Lite però la finìs lè parchè da 'd lè in avànti i càtan la luś sōl dū racòlti, Sampladelic Relics & Dancefloor Oddities un disc ad remìx dal 1996 e The Very Best of Deee-Lite dal 2001.

In séguit Tei 'l à fat gnir fóra di disc par sò cònt méntar la Kirby e Dmitry i àṅ tacâ a far i DJ in discutéca.

In dal 2003 la Lady Miss Kier l'à fat càuśa a la Sega Corporation dgénd che lì lōr i ìsan cupiâ al sò persunàǵ in dal śōg vìddeo Space Channel 5. I giùdas però i gh daṅ còntra in dal 2006 e lē l'è custréta a casàr fóra 600.000 dòlar.

Discugrafìa

Sìngui

1990 - Groove Is in the Heart
1990 - Power of Love
1991 - E.S.P.
1991 - How Do You Say...Love • Groove Is in the Heart (remix)
1991 - Good Beat
1992 - Runaway
1992 - Thank You Everyday
1992 - Pussycat Meow
1994 - Party Happenin' People
1994 - Picnic in the Summertime
1994 - Bring Me Your Love
1995 - Call Me

Àlbum e Racòlti

1990 - World Clique
1992 - Infinity Within
1994 - Dewdrops in the Garden
1995 - Dewdrops in the Remix
1996 - Sampladelic Relics & Dancefloor Oddities
2001 - The Very Best of Deee-Lite

Culegamènt estéran