Cruising
|
C'l artìcul chè 'l è scrit in
Miranduléś |
 Cruising
| ||
 Al Pacino in na figùra dal film | ||
| A casa par gusàr 1980 | ||
|---|---|---|
| Regìa: William Friedkin | ||
| Scritōr: Gerald Walker • William Friedkin | ||
| Atōr: Al Pacino • Paul Sorvino • Karen Allen Richard Cox • Jay Acovone • Randy Jurgensen Joe Spinell • Don Scardino • Barton Heyman Gene Davis • Arnaldo Santana • Allan Miller Ed O'Neill • James Remar • William Russ | ||
| Müsica: Jack Nitzsche • Egberto Gismonti | ||
| Léngua: Ingléś | ||
| Dürä dal film: 102 minüt | ||
| Nasiōṅ: Stat Unî • Germàgna | ||
Cruising (A casa par gusàr) 'l è 'n thriller dal 1980 ad William Friedkin trat da 'n rumànś ad Gerald Walker ch'al cuntàva la stòria véra ad soquànt masamènt in dal mónd dal sès gay in di an Ssanta ad parsòni fati a pès e pò butàti via. Al prutagunìsta dal film 'l è Al Pacino anc s'a 'l inìsi Friedkin 'l iva pascâ Richard Gere. A 'l regìsta a gh'è vgnû vója 'd giràr cal film chè dòp che 'n sò atōr ch'al fava la part 'd 'n infarmēr in dal film L'esorcista, Paul Bateson, 'l iva cupâ dabòṅ di fnòć.
Cruising 'l à muciâ sù dagnóra vint migliòṅ ad dòlar ma al gh'à abû cóntar la cumunità di gay ad New York ch'in alóra l'à fat da tut par sabutàr al film faghénd di stus e di ciòc mént'r al regìsta al giràva 'l séni o anc dand fastìdi tirànd-'g adòs dla luś druànd di spèć dòp èsar muntâ insìma a i téǵ.
Par pasàr la cinsùra, la prudusiòṅ l'à tajâ via quarànta minùt ad pelìcula ch'l'è pò andàda pardùda. In una dal séni scartàdi a gh'è qvéla in du a s véd su 'n mur la scrita „A sém dapartùt“.
Sunt
Da gl'àqui dal fiùm Hudson, in un cald dè 'd Istâ, a salta fóra 'l bras tajâ 'd 'n óm. La pulisìa la gh'à da catàr al sasèṅ sàdig ad soquànt fnòć masâ scurtlâ e la pénsa che lò 'l vaga a catàr-i in soquànt bar gay sadumàś cuma “al gnàł dl'àquila”, “al banchét” o “'l fòs di uśèi”. Dòp avér fat a mènt che tut al vitmi i èṅ di óm ad trént'an a 'l incìrca, cun òć e cavìi scûr, al capitàṅ Edelson (Paul Sorvino) al dmanda a òṅ di suo ch'al gh sumìlia dimóndi, Steve Burns (Al Pacino), 'd andàr-'g a fónd faghénd finta 'd ès'r un buśòṅ anc lò sénsa dir gnint a ninsòṅ d'l incàrag, gnanc a la sò muróśa, la Nancy Gates (Karen Allen).
Steve al tōś na cambra in afìt e al dvènt' amìg dal sò vśèṅ ad cà, Ted Bailey (Don Scardino), un śōvan culatèṅ ch'al scriv di tèst p'r al teàtar e ch'al s è mis c'n un balarèṅ, Gregory (James Remar).
Mént'r i masamènt i cuntìnuan, Steve al s insfìlsa in cal mónd lè andànd ad nòt in di lucài gay in du a sucéd da tut, sès lìbar e visióś davànti a i sò òć fra cûi ad fóra, baś in bóca, giachét ad pèl, curàm dapartùt e uciài da pulisiòt. Un dè al decìd ad star-ag c'n camarēr ch'l è sòlit alvàr al maṅ, Skip Lee (Jay Acovone), parchè 'l è sicûr ch'al sia lò al sasèṅ ma a n è mia acsè. Vdénd tuta la cativèria e 'l bòti ch'i gh daṅ i sò culéga dòp avér-al ciapâ, Steve al s rènd cònt ch'a la pulisìa a n gh interèsa minga catàr al culpévul véra ma sōl un respunsàbil da dar in past a i giurnài e anc tut ch'al dar-'g adòs 'l è ségn ch'i 'l òdian parchè 'l è 'n fnòć e basta. Steve al vrév dar-'g a l'élta ma Edelson 'l al cunvìns a cuntinuàr dgénd-ag ch'al gh'à biśógn ad lò.
In séguit a pâr ch'a s sia catàda la strada giùsta tgnénd adrē a 'n sunadōr ad piàṅ, Stuart Richards (Richard Cox), studènt universitàri 'd un prufesōr ch'l éra stâ cupâ da pôc. Chi lò 'l iva patî dimóndi 'l fat che sò pàdar al gh'iva dâ adòs par tuta la vita, anc s'adès lò 'l è mòrt da bèla déś an. 'L è fàcil ch'al sasèṅ a sia pròpria lò ma giusà s'al i à masâ tut lò. Difàti subìt dòp Ted a vèṅ catâ mòrt in dal cèso in un lâg ad sangṿ. Steve al gh'à abû la prumusiòṅ ch'al vliva anc s'l è armàś sgnâ par sèmpar. Al sò rapòrt cun la Nancy al s è arsurâ dimóndi. Méntar lò 'l è drē a far-as la barba guardànd drit in dal spèć, al gh'à intensiòṅ dòp ad dir quèl 'd impurtànt a la sò muróśa, lē la cata in sna scrana i sò vistî, al giachét ad pèl, gl'uciài da pulisiòt e 'l brét da pilòta 'd aparéć e la s i mét adòs.