Annika Beck
|
C'l artìcul chè 'l è scrit in
Miranduléś |
L’Annika Beck (Gießen, 16 ad Favràr dal 1994) l'è na tenìsta tedésca ch'l'à vins al tìtul dal Roland Garros dal 2012 di śōvan. La s è stablìda a Bonn, l'è élta 170 cm e la péśa 59 chilo, la dróa al bras dèstar e la tira 'l arvèrs a dū maṅ.
L'è bòna ad dascórar in Tedésc, in Ingléś e in Spagnōl. A gh piàś sunàr al viulèṅ, lèśar (al sò lìbar preferî 'l è Twilight) e scultàr dla mùśica, specialmènt qvéla dla Rihanna, dla Lady Gaga e di Linkin Park.
L'è stada la nùmar quarànta-tri dal mónd al 17 ad Mars dal 2014 e in dla sò caréra l'à vins sèt tìtui ITF, śugànd anc na finàl in dal turnèo WTA dal Lussembûrgh in dal 2012.
Caréra
La tedésca la taca a pistàr i camp dal sircùit ITF a quind'ś an, in dal 2009. Dòp soquànt tintatìṿ ad qualificàr-as p'r i turnèo WTA in dal 2011, la gh la cava finalmènt in d'l Avrìl dal 2012 a Cupenàghen ma la và fóra subìt par 4-6 4-6 cun la Petra Martić. A Båstad in Luj la fà cumpàgn par pò pèrdar a 'l prim tùran da la Klára Koukalová par 6-2 3-6 4-6. A Quebec City, in dua la gh'à di punt abàsta par śugàr diretamènt in dal tablòṅ prinsipàł, a riva la prima vìnsida cun la śvisra ad pàdar bergamàsc Romina Oprandi. In Setémbar la s mét in bisàca un tìtul ITF da stantasèt-mila dòlar, baténd in finàl la Stefanie Vögele par 6-2 6-4, e acsè la riva a èsar la nùmar 116 dal mónd. Vinsénd-an àtar dū cumpàgn a la fiṅ d'l an, la finìs la stagiòṅ a la stantnuvéśma puśisiòṅ dal ranking WTA.
La taca c'n al spìrit giùst al 2013 rivànd par la prima vòlta in caréra in di quàrt 'd un turnèo WTA a Shenzhen baténd prima la Garbiñe Muguruza Blanco par 6-2 6-7 6-4 e pò la Su-Wei Hsieh par 6-3 6-0 ma pò la céd in tri sét a la Shuai Peng. A Melbourne la s férma a 'l secónd tùran cun l'Ayumi Morita mént'r in di Stat Unî a Indian Wells e a Miami la và a cà subìt. In Avrìl la riva invéci in semifinàl a Katowice in Pulògna in dua però la pèrd séc da la Roberta Vinci, pò vinsidōra dal turnèo, par 1-6 0-6. Dòp soquànt turnèo andâ mâl (prim tùran a Stucàrda e a Straśbûrg, qualificasiòṅ a 'l arvèrsa a Esturìl e a Madrid), la tedésca la pèrd a 'l secónd tùran a 'l Roland Garros da la Viktoryja Azaranka par 4-6 3-6. In Śugn, baténd la Karin Knapp 6-4 6-2, la riva in di quàrt a Nurimbèrga in dua la céd a la carta salvàdga Andrea Petković par 6-4 3-6 5-7. In Luj la fà i quàrt anc a Bùdapest (4-6 1-6 da la Yvonne Meusburger) e a Bad Gastein (sćiancàda chè 0-6 1-6 da la Karin Knapp che chè la s tōś l'arvìnsida sèg). In Istâ la mét insém tri prim tùr'n ad fila in di Stat Unî a Cincinnati, New Haven e US Open. La cuntìnua acsè anc a Tokyo, Pechîṅ e a Linz, sōl a Seùl la gh la cava a vìnsar 'n incóntar ma cun la nùmar duśènt dal mónd, la giapunéśa Risa Ozaki, e in tri sét. In Utóbar la s tira sù in Lussembûrgh in dua la riva par la prima vòlta in finàl dand la paga a la Cvetana Pironkova, a la Lucie Šafářová, a la Katarzyna Piter e a la Stefanie Vögele. In d'l ùlt'm at però la céd a la Caroline Wozniacki par 2-6 2-6.